Foto: Qeveria e Malit të Zi / Vlada Crne Gore
Më 26 janar në Bruksel do të mbahet Konferenca Ndërqeveritare mes Malit të Zi dhe Bashkimit Evropian, ku Mali i Zi do të mbyllë kapitullin 32 – Mbikëqyrja Financiare.
Ky kapitull ka të bëjë me zbatimin e standardeve ndërkombëtare të pranuara në kontrollin financiar të brendshëm publik, auditimin e jashtëm, praktikat më të mira të BE-së dhe përdorimin e tyre në të gjithë sektorin publik, duke siguruar disiplinë dhe transparencë në përdorimin e fondeve kombëtare dhe atyre të BE-së.
Ministrja e Çështjeve Evropiane, Maida Gorçeviq, e vlerësoi këtë si një lajm shumë pozitiv dhe theksoi se ky hap tregon përparim të rëndësishëm në vitin më të rëndësishëm të rrugëtimit integrues të Malit të Zi.
Ajo nënvizoi gjithashtu mbështetjen e fortë nga Qiproja, që kryeson Këshillin e BE-së, dhe përkushtimin e gjithë shteteve anëtare të BE-së për zgjerimin dhe anëtarësimin e Malit të Zi deri në vitin 2028.
Mbyllja e kapitullit 32 është një sinjal i qartë besimi nga BE-ja në aftësinë e institucioneve malazeze për të mbrojtur interesat financiare të shtetit dhe të BE-së dhe për të menaxhuar në mënyrë të përgjegjshme dhe transparente fondet publike. Ky kapitull bën pjesë në Klasterin 1 – të Drejtat Themelore, dhe mbyllja e tij forcon besueshmërinë e procesit të reformave.
Përfitimet kryesore të mbylljes së këtij kapitulli përfshijnë:
- Përmirësimin e sistemit të kontrolleve financiare të brendshme.
- Forcimin e pavarësisë dhe kapacitetit të Institucionit të Shtetit të Auditimit.
- Mbrojtjen e interesave financiare të BE-së dhe parandalimin e falsifikimit të euros.
- Krijimin e Inspektoratit të Buxhetit për kontroll më të fortë mbi shpenzimet publike.
Ky hap thekson përkushtimin e qeverisë së Malit të Zi për mbrojtjen e fondeve publike dhe është një tregues i besimit të BE-së në kapacitetin institucional të vendit për të përmbushur detyrimet e anëtarësimit.
