Bashkimi Europian ka reaguar ashpër ndaj ideve që kërkojnë nga Ukraina të heqë dorë nga territore të saj në këmbim të paqes me Rusinë. Shefja e diplomacisë europiane, Kaja Kallas, tha se kjo qasje është e papranueshme dhe thellësisht e rrezikshme për rendin ndërkombëtar. “Nëse këto territore do të lëshohen kaq thjesht, atëherë mesazhi që u përcillet botës është se po, mund të përdorni forcën kundër fqinjëve dhe të merrni çfarë dëshironi. Ne nuk duhet të harrojmë që Rusia është agresori dhe Ukraina viktima. Nuk duhet të ushtrojmë presion ndaj viktimës”, – deklaroi Kallas. Deklarata vjen pas sugjerimeve nga ekipi i ish-presidentit amerikan Donald Trump, që Ukraina të dorëzojë rajonin e Donbasit si pjesë e një marrëveshjeje armëpushimi me Rusinë. Kryenegociatori i Trump, Steve Witkoff, ka kërkuar publikisht që Presidenti ukrainas Volodymyr Zelenskyy të pranojë këtë kompromis, ndërsa vetë Trump deklaroi në një intervistë për Fox News se Rusia “do të mbajë një pjesë të territorit të pushtuar”. Në sfond të këtyre zhvillimeve, është paralajmëruar një takim i mundshëm Trump–Putin në Budapest, çka ka ngritur shqetësime në radhët e aleatëve europianë të Ukrainës. Nga Berlini, qarqet qeveritare kanë përcjellë një mesazh të qartë përpara samitit të BE-së që zhvillohet këtë javë në Bruksel: “Motoja është e qartë: Ne nuk e lemë Ukrainën në baltë.” Në qendër të takimit të liderëve të BE-së të enjten dhe të premten do të jetë diskutimi për një paketë financimi afatgjatë për Ukrainën, përfshirë edhe përdorimin e pasurive ruse të ngrira në Europë. Sipas mediave gjermane, po krijohet një konsensus i gjerë mes vendeve anëtare për ta përdorur këtë pasuri si pjesë e një kredie reparacioni për Ukrainën, pavarësisht disa çështjeve teknike që mbeten ende të hapura.
