Foto: AA
Banka Qendrore e Republikës së Kosovës (BQK) dhe Banka Evropiane për Rindërtim dhe Zhvillim (BERZH), së bashku me iniciativën We për Gratë Sipërmarrëse në Kosovë, kanë lansuar Kodin “We Finance”, raporton Anadolu.
Në lansimin e këtij kodi ku mori pjesë edhe presidentja Vjosa Osmani, u tha se kjo është një iniciativë e cila rritë angazhimin për një ekosistem financiar që rritë fondet e ofruara për ndërmarrjet mikro, të vogla dhe të mesme të udhëhequra nga gratë, në mënyrë që ato të rriten dhe t’i shtojnë vlerë ekonomisë dhe komuniteteve të tyre.
Presidentja Osmani tha se lansimi i Kodit “We Finance” është moment historik jo vetëm për Bankën Qendrore por për gjithë shoqërinë dhe vendin tonë.
Osmani tha se duke mbyllur hendekun financiar për gratë nuk është vetëm një nevojë por edhe një mundësi për të gjithë, ngase duke adresuar barrierat financiare për gratë ne jo vetëm që promovojmë barazinë gjinore por nxisim inovacionin, vendet e reja të punës dhe rritjen ekonomike.
“Jam e bindur se kjo iniciativë do të krijojë më shumë ekosistem financiar gjithëpërfshirës ku gratë sipërmarrëse mund të lulëzojnë gjithashtu”, theksoi Osmani.
Drejtori i Bankës Evropiane për Rindërtim dhe Zhvillim (BERZH) në Kosovë, Sergiy Maslichenko tha se kodi u mundëson grave qasje në financa për të ndërtuar një të ardhme të qëndrueshme për të gjithë.
Ai tha se për vite me radhë, përmes këtij programi, janë mbështetur gratë sipërmarrëse duke ofruar akses në linja të dedikuara krediti dhe iniciativa për ngritjen e kapaciteteve për institucionet financiare
“Këtu në Kosovë programi i biznesit për gratë ka kryer tashmë 16 milionë përmes pesë institucioneve partnere financiare, por ne, edhe pse kemi qenë në mbështetje të grave sipërmarrëse për kohë të gjatë, kemi parë gjithashtu edhe sfidat e vazhdueshme. Derisa gratë synojnë të bëhen sipërmarrëse, sikurse burrat, ato përballen me barriera të ndryshme që ua kufizojnë aftësitë për të realizuar potencialin e tyre”, theksoi Maslichenko.
“We Finance” pilotohet në 26 vende të botës ndërsa u lansua zyrtarisht në tetor të vitit 2023 në takimet vjetore të Bankës Botërore – Fondit Monetar Ndërkombëtar.
