Foto: predsjednik.me
Presidenti i Malit të Zi, Jakov Millatoviq, ka nisur një vizitë zyrtare në Mbretërinë e Suedisë, që është vizita e parë e një presidenti malazez në këtë vend që nga rivendosja e pavarësisë së Malit të Zi.
Në Stokholm, ai është takuar me Kryeministrin suedez Ulf Kristersson dhe Ministren për Çështjet e BE-së, Jessica Rosénkrantz.
Gjatë takimit u theksua se marrëdhëniet midis Malit të Zi dhe Suedisë janë miqësore dhe aleate, me qëllimin që ato të ngriten në një nivel më të lartë përmes bashkëpunimit politik dhe ekonomik konkret.
Millatoviq e quajti vizitën “historike” dhe theksoi rëndësinë e mbështetjes së Suedisë në rrugën evropiane të Malit të Zi.
Ai përsëriti ambicien që Mali i Zi të bëhet shteti i 28-të anëtar i BE-së deri në vitin 2028, dhe theksoi nevojën për përfundimin e reformave të nisura.
Të dyja palët ranë dakord për potencialin e madh për rritjen e bashkëpunimit ekonomik, veçanërisht në fushat e tranzicionit energjetik, burimeve të ripërtëritshme dhe zgjidhjeve digjitale.
Millatoviq vuri në dukje se tregtia, investimet dhe numri i turistëve nga Suedia janë në nivele të ulëta dhe se është e nevojshme të punohet më shumë për t’i forcuar këto lidhje.
Ai gjithashtu përmendi rëndësinë e bashkëpunimit brenda NATO-s, aleancë në të cilën Suedia u anëtarësua vitin e kaluar.
Kryeministri Kristersson konfirmoi mbështetjen e plotë të Suedisë për procesin e integrimit evropian të Malit të Zi dhe përmendi rëndësinë e përmbushjes së reformave në këtë rrugë.
Takimi përfundoi me vlerësimin se dialogu politik në nivel të lartë dhe projektet ekonomike konkrete janë rruga më e shpejtë drejt marrëdhënieve më të forta dhe integrimit evropian të Malit të Zi.
