Shqipëria pritet të konfirmohet zyrtarisht si vendi mikpritës i samitit të NATO-s për vitin 2027, gjatë takimit të ardhshëm të Aleancës që do të mbahet javën e ardhshme në Hagë.
Lajmi vjen nga burime të besueshme, përfshirë Radio Evropa e Lirë, e cila ka siguruar një draft të deklaratës përfundimtare të samitit të sivjetshëm. Në këtë draft, ndër të tjera, theksohet:
“Ne shprehim mirënjohjen tonë për mikpritjen nga Mbretëria e Holandës. Mezi presim takimin tonë të ardhshëm në Turqi më 2026, i cili do të pasohet nga një takim në Shqipëri.”
Në këtë mënyrë, Shqipëria do të bëhet vendi i parë në Ballkanin Perëndimor që pret një samit të nivelit më të lartë të NATO-s, duke dëshmuar rritjen e rolit dhe profilit të saj në arkitekturën e sigurisë euroatlantike.
Kryeministri Edi Rama, i cili më herët këtë vit fitoi mandatin e tij të katërt qeverisës, kishte paralajmëruar që në verën e vitit të kaluar se Shqipëria kishte shprehur gatishmërinë dhe dëshirën për të organizuar këtë ngjarje madhore në vitin 2027.
Drafti i deklaratës riafirmon gjithashtu angazhimin e udhëheqësve të NATO-s për mbrojtje kolektive sipas Nenit 5 të Traktatit të Aleancës, si dhe vendosmërinë për të mbrojtur qytetarët, territorin dhe demokracitë e vendeve anëtare.
Aleatët pritet të zotohen për rritje të mëtejshme të investimeve në fushën e mbrojtjes, duke vendosur objektivin ambicioz që shpenzimet të arrijnë të paktën 5% të Prodhimit të Brendshëm Bruto deri në vitin 2032 – ku 3.5% do të shkojë për kapacitetet ushtarake, dhe 1.5% për infrastrukturën kritike, inovacionin dhe zhvillimin industrial të sektorit të mbrojtjes.
Ky zhvillim historik vjen në një kohë kur Shqipëria është angazhuar fuqishëm për të përmbushur të gjitha detyrimet e saj si anëtare e NATO-s, duke e forcuar rolin e saj si një partnere e besueshme dhe kontribuuese për sigurinë e përbashkët.
