Kriza e shkaktuar nga pandemia e koronavirusit do të ketë një ndikim të paparë në jetën ekonomike dhe shoqërore, tha eurodeputetja Tanja Fajon, duke përmendur nevojën për një strategji të fortë dhe gjithëpërfshirëse evropiane për të ndihmuar vendet e varfëra.
Duke iu referuar ndihmës së paralajmëruar të Bashkimit Evropian (BE) të destinuar për Malin e Zi, ajo tha se kohërat e vështira me të cilat përballen të gjithë kërkojnë solidaritet dhe se askush nuk duhet të mungojë.
“Të gjitha vendet e Ballkanit Perëndimor duhet të përfshihen në përgjigjen tonë të përbashkët evropiane. Kjo është arsyeja pse unë jam shumë e kënaqur që rregullorja e propozuar është miratuar dhe tani Fondi i Solidaritetit mund të përdoret gjithashtu për urgjencat e shëndetit publik,” tha Fajon për agjencinë e lajmeve MINA.
Sipas saj, Mali i Zi do të përfitojë nga Fondi i Solidaritetit po aq sa të gjitha vendet anëtare dhe vendet e tjera negociuese.
“Ne do të përdorim të gjitha instrumentet në dispozicion dhe do të mbështesim njëri-tjetrin. Kjo krizë shëndetësore do të ketë pasoja të paparë në jetën tonë ekonomike dhe sociale. Kriza do të jetë shumë e gjatë, kështu që ne duhet të mësojmë nga njëri-tjetri dhe të punojmë në një strategji të fortë dhe gjithëpërfshirëse evropiane që do të ndihmojë veçanërisht vendet dhe qytetarët më të varfër,” tha Fajon.
Ajo deklaroi se pranimi i Malit të Zi në BE është në axhendën aktuale për zgjerimin e ardhshëm të Unionit.
“Metodologjia e re e pranimit e prezantuar në fillim të vitit është një shtysë për intensifikimin e reformave. Jam e bindur që mbështetja financiare e BE-së është gjithashtu një nxitje,” tha Fajon.
Sipas saj, zgjerimi është rikthyer qartë në rrugën e duhur duke hapur negociatat e pranimit me Maqedoninë e Veriut dhe Shqipërinë.
“Mali i Zi ka bërë përparim të rëndësishëm vitet e fundit, por mbetet akoma më shumë për të bërë. Luftimi i korrupsionit dhe krimit të organizuar, reformës sociale dhe ekonomike, respektimit të sundimit të ligjit – të gjitha këto përpjekje janë në shërbim të përmirësimit të jetës së qytetarëve,” tha Fajon.
Ajo tregoi që jeta pas pandemisë koronavirus nuk do të jetë e njëjtë.
“Por unë mbetem optimiste sepse kemi dëshmuar edhe një herë se solidariteti evropian është i gjallë dhe se, veçanërisht në kohë krize, bashkëpunimi dhe mbështetja jonë është thelbësore,” tha Fajon.
Sipas saj, vendet do të duhet të përdorin të gjitha instrumentet financiare të disponueshme, burimet e reja të veta dhe me përgjigjen e guximshme dhe inovative evropiane për të luftuar pandeminë dhe për të krijuar një jetë të sigurt për qytetarët në të ardhmen.
