Foto: Erkin Keçi / AA
Presidentja e Kosovës, Vjosa Osmani ka pritur në takim presidentin e Letonisë, Edgars Rinkevics, raporton Anadolu.
Pas një takimi që ka zgjatur rreth një orë në Zyrën e Presidentes, Osmani tha se vizita e Rinkevics në Prishtinë është dëshmi e marrëdhënieve të ngushta dhe tashmë të shkëlqyeshme midis Kosovës dhe Letonisë.
Osmani tha se Letonia sot është partnere e fuqishme e Kosovës, ngase ajo ka përkrahur procesin e shtetndërtimit të Kosovës por edhe vazhdon të mbështesë anëtarësimin e shtetit në organizata ndërkombëtare.
Sipas Osmanit, sikurse Letonia ashtu edhe Kosova jemi të përkushtuara thellë për vlerat euroatlantike dhe Kosova ka nevojë për të mësuar nga rrugëtimi euroatlantik i Letonisë.
“Është edhe koha që me prioritet të largohen masat e padrejta që BE-ja i ka akoma në fuqi ndaj Kosovës dhe po ashtu sa më shpejtë të gjendet metoda, rruga përpara, për statusin e vendit kandidat të vendit tonë. Ne jemi mirënjohës edhe për mbështetjen tuaj në procesin e anëtarësimit në Këshillin e Evropës, por edhe bashkëpunimin tonë bilateral në shumë fusha, nga mbrojtja, për të cilën diskutuam sot gjerësisht, deri tek fusha e arsimit”, theksoi Osmani.
Ajo gjithashtu shprehu falënderime edhe për vendimin e Letonisë për ta zgjatur qëndrimin e 140 ushtarëve letonezë të KFOR-it deri në dhjetor të vitit 2025.
Presidenti letonez, Edgars Rinkevics, në fjalën e tij tha se në Letoni janë të interesuar për përforcimin e marrëdhënieve politike dhe të zhvillimit ekonomik.
Ai tha sektorët si farmaceutika, teknologjia e informacionit do të jenë me interes të përbashkët.
“Letonia e mbështet plotësisht integrimin e Kosovës në organizatat ndërkombëtare dhe diskutuam gjerësisht anëtarësimin në Këshillin e Evropës. E keni mbështetjen tonë të plotë. Gjithmonë ju kemi mbështetur për anëtarësim të plotë aty dhe besojmë se ky anëtarësim mund ta hapë rrugën edhe në organizata tjera ndërkombëtare. Po ashtu, e përsëris mbështetjen e plotë të Letonisë për procesin e integrimit evropian të Kosovës”, theksoi Rinkevics.
Ai tha se BE-ja duhet t’i heq masat kufizuese të vendosura ndaj Kosovës, derisa shtoi se mbështesin normalizimin e plotë midis Kosovës dhe Serbisë si dhe vazhdimin e dialogut “për ta përmirësuar stabilitetin dhe sigurinë në rajon në një afat më të gjatë”.
Rinkevics do të qëndrojë në Prishtinë edhe gjatë ditës së premte.
