Që nga fillimi i korrikut deri në mesin e shtatorit 2025, në Mal të Zi janë regjistruar 197 raste të infeksioneve të traktit tretës, njoftoi Instituti i Shëndetit Publik (ISHP).
Sipas të dhënave, ky numër është i ngjashëm me atë të periudhës së njëjtë të vitit të kaluar.
Shkaktarët më të shpeshtë të infeksioneve ishin:
- Rotavirusi – 97 raste (kryesisht tek fëmijët 0–4 vjeç),
- Adenovirusi – 1 rast,
- Enterokolit akut (pa shkaktar të qartë) – 37 raste.
Epidemiologët theksojnë se sëmundjet infektive të zorrëve janë të pranishme gjatë gjithë vitit, por shfaqen më shpesh gjatë verës për shkak të: temperaturave të larta, prishjes më të shpejtë të ushqimit, konsumimit të frutave dhe perimeve të paqëruara mirë, dobësimit të efektit të acidit të stomakut për shkak të marrjes së lartë të lëngjeve.
Simptomat më të zakonshme janë: diarreja, nauzea, të vjella, dhimbje barku dhe temperaturë.
Ndërsa infeksionet virale karakterizohen me jashtëqitje ujore, ato bakteriale mund të përfshijnë gjak, mukus dhe erë të rëndë.
ISHP gjithashtu ka vënë në dukje një rritje të ndjeshme të rasteve me COVID-19 në javët e para të vitit të ri shkollor.
