Foto: KE
Kompanitë amerikane të armëve do të përjashtohen nga një nismë e shpenzimeve të mbrojtjes prej 150 miliardë eurosh e Bashkimit Evropian, sipas Financial Times, e cila citon zyrtarë të paidentifikuar.
Përjashtimi raportohet se do të mbulojë gjithashtu sistemet e armëve të shitura nga një vend i tretë ku SHBA ka “autoritet projektimi”, që do të thotë se vendos kufizime në prodhimin e tyre, siç është rasti i sistemit të raketave Patriot.
Megjithatë, ky përjashtim nuk do të zbatohej nëse SHBA-ja nënshkruan një partneritet të mbrojtjes dhe sigurisë me Brukselin, raportoi FT.
Përjashtimi, nëse bihet dakord nga vendet anëtare të BE, do të shtrihet edhe në kompanitë e armëve nga Britania e Madhe dhe Turqia.
Përjashtimi i prodhuesve amerikanë të armëve nga fondi i mbrojtjes shumë miliarda dollarësh i BE-së përfaqëson një ndryshim të rëndësishëm në marrëdhëniet transatlantike, të shtyrë nga Presidenti Donald Trump.
Trump e ka bërë të qartë se dëshiron që Evropa të marrë më shumë përgjegjësi për mbrojtjen e saj dhe një rol më të madh në NATO, ndërsa SHBA-ja e zhvendos fokusin e saj në konkurrencën me Kinën.
Ndërsa SHBA ka qenë historikisht furnizuesja kryesore e teknologjisë ushtarake për vendet evropiane, disa liderë të BE-së kanë bërë thirrje për pavarësi më të madhe në prokurimin dhe strategjinë e mbrojtjes.
Presidenti francez Emmanuel Macron ka folur për nevojën për “autonomi strategjike”, duke argumentuar se Evropa nuk duhet të mbështetet shumë te SHBA-ja për aftësitë ushtarake.
Lëvizja vjen gjithashtu në mes të ndryshimeve më të gjera gjeopolitike, duke përfshirë shqetësimet mbi paparashikueshmërinë politike të SHBA-së.
Dhe kjo vjen ndërsa SHBA-ja dhe BE-ja po përballen kokë më kokë për tregtinë, duke vendosur tarifa mbi njëra tjetrën, të filluara nga Trump dhe të përshkallëzuara nga Brukseli.
