Foto: TOP24.MK
Kryeministri në dorëheqje i Serbisë, Millosh Vuçeviç, I ka dërguar kërkesë FBI-së amerikane dhe Shërbimit rus të Sigurisë (FSB), për të kryer hetime të pavarura nëse është përdorur ose jo armë sonike në protestën e 15 marsit në Beograd.
“Me përgjegjësinë më të madhe mund të them se, më 15 mars, në asnjë lokacion, nuk është përdorur armë sonike apo diçka e ngjashme. Asnjë urdhër nuk është lëshuar për të dhe askush nuk e ka parë atë pajisje. Është e pamundur të mos ketë lëndime shëndetësore në momentin që përdoret ajo pajisje. Ajo shkakton pasoja të menjëhershme”, tha Vuçeviç.
Më herët, Ministria e Punëve të Brendshme e Serbisë njoftoi se ministri Ivica Daçiç i ka dërguar një letër drejtorit të FBI-së, duke e ftuar të ndihmojë në një analizë në fushën e përdorimit të pajisjeve që lëshojnë valë zanore.
Ministria e Brendshme është përballur me akuza publike dhe mediatike, se anëtarët e saj kanë përdorur armë sonike ose të quajtura ndryshe ‘topa zanorë’ gjatë mitingut publik, të mbajtur në Beograd më 15 mars.
Paraprakisht, zyrtarë të lartë shtetërorë të Serbisë kanë këmbëngulur se as policia dhe as ushtria nuk posedojnë armë të tilla. Sipas organizatës ndërkombëtare joqeveritare, “Earshot”, në bazë të analizave të videove dhe audio-incizimeve nga protestat e 15 marsit, deklaroi se në to dëgjohet tingull i prodhuar nga arma Vortex Ring Gun, apo topi Vortex.
Topi zanor i përket një grupi armësh jovdekjeprurëse, por sipas udhëzimeve të Kombeve të Bashkuara për vitin 2020, përdorimi i tyre mund të shkaktojë lëndime serioze ose vdekje.
