Foto: Bota Sot
Komisioni Qendror i Zgjedhjeve ka njoftuar të martën se janë numëruar 78% e votave për kandidatët për deputetë, apo 1,970 vendvotime nga 2533 sa janë gjithsej.
Ky proces pritet të përmbyllet brenda pak ditësh bëhet e ditur nga ky institucion.
Besoj që ky proces do të përmbyllet brenda pak ditësh, sepse në bazë të këtyre shifrave të fundit do të thotë se numri i vendvotimeve që janë numëruar deri më tani si dhe verifikimi që është bërë deri më tani, bëhet fjalë për rreth 2 mijë vendvotime.
Po ashtu, KQZ ka vazhduar me verifikimin e votave me postë të ardhura nga diaspora.
Deri më 18 shkurt, janë verifikuar 28 mijë e 99 pako, prej të cilave janë aprovuar 26 mijë e 13 dhe janë refuzuar 2 mijë e 57.
Arsyeja pse janë refuzuar këto dërgesa postare është se ato janë dërguar nga persona që janë anuluar gjatë regjistrimit si votues jashtë Kosovës, u mungonte fleta e regjistrimit apo janë dërguar më shumë se një herë.
Gjatë votimit përmes postës, KQZ ka pranuar rreth 69 mijë pako me fletëvotime.
Komisioni Qendror i Zgjedhjeve ka njoftuar se janë 12,801 vota me kusht dhe 2,597 vota nga personat me nevoja të veçanta, për të cilat pritet të bëhet verifikimi e që mund të numërohen pasi të përfundojë procesi i numërimit të votave të kandidatëve për deputetë.
