Foto: Wikipedia
Komisioni Evropian (KE) mbështet një zgjidhje ligjore që do të përcaktonte që të gjitha zgjedhjet lokale në Mal të Zi të mbahen njëkohësisht, por nuk ka një qëndrim specifik nëse zgjedhjet lokale duhet të lidhen me zgjedhjet parlamentare.
Kështu ka thënë shefi i njësisë për Malin e Zi dhe Serbinë në Drejtorinë e Përgjithshme për Fqinjësi dhe Negociata të Zgjerimit në KE, Jiri Pleciti, në përgjigje të letrës së deputetit të Lëvizjes „Evropa Tani“, Vasilije Çarapiq.
Çarapiq pyeti nëse Bashkimi Evropian (BE) do të mbështeste një zgjidhje ligjore që, për të përfunduar reformën zgjedhore, si dhe reformat e tjera të rëndësishme për hyrjen e Malit të Zi në BE, të gjitha zgjedhjet lokale të mbahen së bashku me zgjedhjet e ardhshme parlamentare.
Çarapiq theksoi se zgjedhjet lokale në Mal të Zi mbahen pothuajse çdo dy muaj, gjë që rëndon administratën publike, ndryshon fokusin politik dhe kërkon shumë para.
“Ndërsa detajet në lidhje me zhvillimin e zgjedhjeve lokale janë përgjegjësi kombëtare, siç u theksua më parë, Komisioni Evropian mbështet një zgjidhje ligjore që do të parashikonte që të gjitha zgjedhjet lokale të mbaheshin njëkohësisht”, deklaroi Pleciti në një përgjigje që agjencioni MINA kishte akses.
Ai tha se KE nuk ka qëndrime specifike nëse zgjedhjet lokale duhet të lidhen me zgjedhjet parlamentare.
“Kur bëhet fjalë për kombinimin e llojeve të ndryshme të zgjedhjeve në të njëjtën ditë, praktikat midis shteteve anëtare të BE-së ndryshojnë ndjeshëm”, shtoi ai.
Ministri i Administratës Publike Marash Dukaj para pak kohësh sërish apeloi në Kuvend që Komisioni për Reformë Gjithëpërfshirëse Zgjedhore ta trajtojë këtë çështje, duke qenë se iniciativa ka kohë që është në procedurë parlamentare.
Në muajin maj, departamenti i drejtuar nga ministri Dukaj ka dorëzuar iniciativa në Kuvend dhe në Komisionin për Reformë Gjithëpërfshirëse Zgjedhore që qytetarët të zgjedhin drejtpërdrejt kryetarët e komunave dhe zgjedhjet në të gjitha njësitë e vetëqeverisjes lokale të mbahen në të njëjtën ditë.
