Foto: Qeveria e Malit të Zi / Vlada Crne Gore
Komisioni i Venecias ka miratuar mendimin për Draftin e përditësuar të Ligjit për Qeverinë e Malit të Zi, ka shkruar në rrjetin X ministri i Administratës Publike, Marash Dukaj.
Ai ka përshëndetur mendimin e Komisionit të Venecias dhe ka theksuar veçanërisht kënaqësinë për dialogun që kanë zhvilluar gjatë këtij procesi të rëndësishëm legjislativ.
“Ligji i parë për Qeverinë në Mal të Zi është një hap historik drejt reformës institucionale. Komisioni i Venecias në seancën plenare javën e kaluar miratoi mendimin për Draftin e përditësuar të Ligjit për Qeverinë e Malit të Zi. Përshëndes mendimin e Komisionit të Venecias dhe veçanërisht theksoj kënaqësinë për dialogun që kemi pasur në këtë proces të rëndësishëm legjislativ,” ka shkruar Dukaj.
Ai thekson se Ministria e Administratës Publike ka treguar se ka kapacitet për të zbatuar opinionet ekspertësh të Komisionit të Venecias dhe për të ndjekur nevojat demokratike të Malit të Zi.
“Komisioni i Venecias e ka vlerësuar pozitivisht faktin që Mali i Zi ka marrë parasysh shumicën e rekomandimeve kyçe nga opinioni i mëparshëm dhe ka përgëzuar ndryshimet e propozuara në krahasim me draftin e vitit 2023. Ne kemi marrë disa udhëzime shtesë, të cilat do t’i shqyrtojmë me kujdes në përputhje me kuadrin kushtetues-politik dhe juridik,” ka shtuar ai.
Dukaj tha se janë përshëndetur veçanërisht zgjidhjet që lidhen me verifikimin e integritetit të funksionarëve, të cilat janë në përputhje me rekomandimet e GRECO-s dhe janë përfshirë në tekstin e ligjit.
“Me Komisionin e Venecias ndajmë bindjen se ky mekanizëm do të kontribuojë më tej në forcimin e besimit të qytetarëve në institucione. Ky ligj është një hap i rëndësishëm në punën dhe vizionin tonë për modernizimin, transparencën dhe forcimin e institucioneve të pushtetit ekzekutiv dhe të sistemit politik në përgjithësi,” tha ai.
