Ministria e Zhvillimit Ekonomik mbështet aktivisht sipërmarrësit dhe zejtarët e rinj përmes asistencës financiare dhe mentoruese për të forcuar konkurrencën e tyre në tregun vendas dhe të jashtëm, tha ministri i Zhvillimit Ekonomik, Nik Gjeloshaj.
Gjeloshaj sot nënshkroi kontrata me 20 shfrytëzues të linjës programore – Kupona për femra dhe të rinj në kuadër të Programit për Përmirësimin e Konkurrueshmërisë së Ekonomisë për këtë vit, si dhe me 21 përdorues të Programit për Zhvillimin e Zejtarisë për këtë vit, për të cilën janë ndarë gjithsej 400 mijë euro.
Ai tha se mbështetja e ndërmarrjeve të vogla dhe të mesme është kyçe për arritjen e zhvillimit ekonomik në vendin tonë.
“Pa zhvillimin e ndërmarrjeve të vogla dhe të mesme nuk ka përparim ekonomik, prandaj fokusi ynë duhet të jetë në to, veçanërisht në prodhim. Është e rëndësishme që ajo që prodhojmë të jetë konkurruese jo vetëm në tregun e brendshëm, por edhe në atë të jashtëm. Me zvogëlimin e importeve mund të arrijmë zhvillim ekonomik dhe ky duhet të jetë qëllimi ynë i përbashkët”, ka vlerësuar Gjeloshaj.
Siç shtoi ai, Ministria do t’i përkushtohet kësaj detyre.
„Të rinjtë janë ata që lëvizin botën e biznesit me idetë dhe inovacionet e tyre dhe duke mbështetur iniciativat e tyre, ne po ndërtojmë themelet për të ardhmen,“ theksoi ministri.
