Foto: TVBoin
Kryetari i Komunës së Ulqinit Genci Nimanbegu ka dalur sot në një konferencë për media ku ka paraqitur pikëpamjet e tij rreth çështjes së dhënies me qira të plazheve te Ulqinit.
Fjalën e plotë të kryetarit të komuës së Ulqinit, Genci Nimanbegu, mund ta lexoni më poshtë:
Të nderuar qytetarë, të nderuar përfaqësues të mediave,
Gjatë muajve të fundit kemi qenë dëshmitarë të miratimit të Programit të lokacioneve të përkohshme në zonën e të Mirave detare pa mendimin pozitiv të asnjë komune bregdetare, pastaj miratimit të çmimores për dhënien me qira të plazheve dhe organizimit të shpejtë të tenderëve, ku mori pjesë edhe kompania e sapo-krijuar e investitorit të njohur Muhamed Alabar.
Sot, kur qëllimet dhe situata janë bërë më të qarta, e ndiej si detyrë të ju drejtohem dhe të shpreh sa vijon:
Në tenderin e zgjatur, ku mori pjesë kompania “Eagle Hills Montenegro”, ndodhi një desant i organizuar pa precedent, i sinkronizuar me institucionet e sistemit.
Të premten kam pasur takim me kryeministrin e Malit të Zi, në të cilin, për habinë time, mori pjesë dhe zoti Muhamed Alabar, investitor në fushën e pasurive të paluajtshme, kompania e të cilit ofroi shumën më të lartë për nëntë plazhe në komunën e Ulqinit. Në atë takim, si dhe në deklaratat e mëvonshme për mediat, na u paraqit interesi për investime në komunën tonë. E kam theksuar qartë që në procesin e planifikimit dhe diskutimeve për investimet janë bërë gabime të rënda, sepse për zhvillim të qëndrueshëm është e nevojshme që të gjitha palët e përfshira të ndajnë një vizion të përbashkët. Vetëm me kuptim dhe pajtueshmëri të ndërsjellë mund të ndërtohet një histori e suksesshme dhe e qëndrueshme afatgjatë.
Dua të theksoj qartë se Komuna e Ulqinit nuk është kundër zhvillimit. Përkundrazi, mbështesim fuqishëm përparimin ekonomik të qytetit tonë, por insistojmë që ai të jetë në përputhje me interesat afatgjata të qytetarëve tanë. Vizioni ynë nuk është i kufizuar vetëm në turizëm. Bota po ndryshon shpejt dhe ne nuk duhet të lejojmë që Ulqini të mbetet varur vetëm nga një sektor. Prandaj, po punojmë për diversifikimin e ekonomisë sonë përmes investimeve në porte, turizmin nautik, sektorin IT, prodhim dhe degë të tjera moderne të ekonomisë.
Për këtë arsye, ne vazhdojmë të insistojmë që ky tender të anulohet, që të gjitha kontratat ekzistuese të vazhdojnë me aneks dhe që ndryshimet e propozuara të Ligjit për të “Mirat Detare” të miratohen në mënyrë që vitin e ardhshëm të realizohen tenderë transparentë për qiradhënien e plazheve dhe objekteve në zonën e të Mirave detare. Rezultatet e këtij tenderi tregojnë qartë se të gjitha pohimet e ministrit përgjegjës dhe të ish-drejtorit të ndërmarrjes publike për menaxhimin e të Mirave detare ishin të pasakta.
Në fakt, ra teza se ky tender mundësonte që qytetarët e Malit të Zi të mund të merrnin plazhet me qira, ndërkohë që u vërtetua se rritja e çmimit të qirave nuk është e justifikuar dhe nuk bazohet në një princip ligjor. Ideja se shteti do të realizojë të ardhura më të mëdha me këtë veprim është e rrezikshme dhe thelbësisht gabim. Qëllimi i shtetit nuk është të realizojë fitim, por të rregullojë tregun, të nxisë aktivitetin ekonomik dhe të sigurojë drejtësi sociale. Po kujtoj se shteti përfiton më shumë përmes TVSH-së gjatë sezonit turistik, dhe këtë vit ka rritur normën e TVSH-së për produktet turistike. Tani, me ngarkesa të tjera të vendosura nga Ndërmarrja Publike për menaxhimin e të Mirave detare, po fitojmë një rritje të çmimeve të shërbimeve tona, duke e bërë turizmin e Ulqinit, të cilin e kemi ndërtuar me kujdes, jo-konkurrueshmëror.
Pra, me këto hapa Qeveria ka arritur të rrezikojë sezonin turistik që vjen, dhe kjo pikërisht në momentin kur tregjet emitente planifikojnë pushimet e tyre vjetore. Pra, anulimi i tenderit dhe nënshkrimi i aneksit të kontratave me qiramarrësit do të ndihmonte në parandalimin e rritjes së çmimeve të shërbimeve, duke bërë që Ulqini të mbetet një destinacion konkurrues dhe duke parandaluar një problem të madh për ekonominë e këtij qyteti.
Në përgjigje të pyetjes parlamentare të deputetit tonë Ilir Çapuni, kryeministri në tetor të vitit të kaluar në Kuvendin e Malit të Zi deklaroi se ka kaluar koha kur Podgorica diktonte vizionin për zhvillimin e komunave. Vizioni i zhvillimit të Ulqinit është rezultat i një konsensusi të gjerë shoqëror dhe është shprehur në dokumente të rëndësishme, përfshirë Strategjinë e Zhvillimit të Komunës së Ulqinit, Studimin Shtetëror të Lokacionit për Plazhin e Madh dhe PHP-në (PUP-in) e Ulqinit. Këto dokumente paraqesin udhëzuesit themelorë për formimin e të ardhmes së qytetit tonë dhe sigurimin e rritjes së qëndrueshme dhe planifikuar të tij, duke marrë parasysh zhvillimin e infrastrukturës, ekonomisë, demografisë, si dhe mbrojtjen e natyrës dhe të gjitha specifikat që e bëjnë Ulqinin një gur të çmuar në rajon.
Zoti Alabar do të na prezantojë në ditët në vazhdim vizionin e tij për zhvillimin e Ulqinit dhe ne, përmes Kuvendit të Komunës dhe institucioneve të tjera përkatëse, do të shqyrtojmë me kujdes opsionet më të mira që mund t’i ofrojmë këtij investitori strategjik që përputhen me interesat e qytetarëve dhe komunitetit.
Njëkohësisht, dua të theksoj se ne mbetemi të qëndrueshëm ndaj principeve tona dhe qëndrimit të përbashkët të të gjitha komunave bregdetare në lidhje me Programin e objekteve të përkohshme në zonën e të Mirave detare. Ky program u miratua pa miratimin e pushtetit lokal, tenderi u shpall pa pjesëmarrjen e tyre dhe Qeveria dhe Kuvendi injoruan iniciativat e të gjitha komunave bregdetare dhe të Shoqatës së Komunave të Malit të Zi, të cilat kërkuan ndryshime të ligjit që rregullon të mirat detare.
Ulqini nxenë një vend unik në Malin e Zi – përveç pasurive të jashtëzakonshme natyrore, ai ka edhe një vlerë të veçantë historike, kulturore dhe identitare. Për shekuj me radhë ka qenë qendra e komunitetit shqiptar në Malin e Zi dhe është detyra jonë që ta ruajmë dhe forcësojmë atë status. Ulqini duhet të mbetet simbol krenarie, pasurie kulturore dhe bukurie natyrore dhe duhet të zhvillohet në përputhje me parimet e mbrojtjes së mjedisit dhe vlerësimin e peizazheve dhe resurseve të tij unike, siç janë Solana, Valdanos, Ada dhe Liqeni i Shasit. Këto vlera nuk duhet të sakrifikohen për interesa afatshkurtra.
Le të mbetet Ulqini perla e Adriatikut, e ruajtur dhe e përmirësuar për brezat e ardhshëm. Le të jenë pasuritë e tij natyrore, pasuria kulturore dhe potenciali ekonomik trashëgimia e fëmijëve dhe nipërve tanë. Zoti bekoftë Ulqinin dhe të gjithë banorët e tij – le të mbetet gjithmonë simbol krenarie, uniteti dhe përparimi!
Kryetari
Genci Nimanbegu
