Debati publik për Projektligjin mbi Komunikimet Elektronike do të fillojë më 25 janar, ka bërë të ditur zëvendëskryeministri për Politikë Ekonomike dhe ministër i Zhvillimit Ekonomik Nik Gjeloshaj.
“Për të informuar publikun në kohën e duhur, Ministria e Zhvillimit Ekonomik do të bëjë një ftesë publike në datën 25 janar 2024 për autoritetet, organizatat, shoqatat dhe individët që t’i bashkohen diskutimit publik dhe të kontribuojnë në përmirësimin e cilësisë së tekstit të Projektligjit mbi Komunikimet Elektronike. Debati publik do të bëhet me paraqitjen e vërejtjeve, propozimeve dhe sugjerimeve në formë të shkruar dhe elektronike, si dhe me organizimin e një tryeze të rrumbullakët”, tha Gjeloshaj.
Sipas tij, ligji i propozuar do të jetë plotësisht në përputhje me ligjet e BE-së dhe praktikat më të mira evropiane, veçanërisht me direktivën e BE-së 2018/1972/Kodi Evropian i Komunikimeve Elektronike të BE-së (EECC).
„Projektligji do të përgatitet në bashkëpunim me të gjitha palët e interesuara, përfshirë Agjencinë për Komunikime Elektronike dhe Shërbime Postare, si dhe përfaqësues të operatorëve dhe sektorit joqeveritar”, përfundoi Gjeloshaj.
