Mali i Zi mund të zërë vendin vakant të anëtarit të 28-të të BE-së në vitin 2028, tha kryeministri i Malit të Zi Millojko Spajiq në Bruksel.
Këtë e tha në një konferencë politike me temën “Qeveria e re, perspektiva të reja?” Ringjallja e përpjekjeve të Malit të Zi për t’u anëtarësuar në BE.
Ai vuri në dukje se investimet në projektet kapitale të infrastrukturës janë një faktor kyç për afrimin e qytetarëve të BE-së nga njëra anë dhe malazezëve nga ana tjetër.
Kryeministri i Malit të Zi prezantoi para audiencës së Brukselit rezultatet e Qeverisë në 100 ditët e para të punës, foli për momentin e fortë që erdhi pas Konferencës Ndërqeveritare të mbajtur në janar, prezantoi një plan për të ruajtur dinamikën e procesit të anëtarësimit dhe iu përgjigj pyetjeve të shumta.
Ai theksoi se anëtarësimi në BE duhet të bazohet në dy shtylla.
“Këto janë zhvillimi i vlerave evropiane që ne ndajmë, veçanërisht përmes forcimit të shtetit ligjor dhe rritjes së përfshirjes në tregun e përbashkët të Evropës. Këto janë përfitimet që qytetarët presin më shumë”, tha ai.
Kryeministri beson se hyrja e Malit të Zi në BE mund të jetë e dobishme për të gjithë.
“Mali i Zi mund të jetë një promovues i madh i vlerave evropiane dhe politikës së zgjerimit në Ballkanin Perëndimor. Si një shoqëri në të cilën të gjitha identitetet e ndryshme janë të mirëseardhura, ne do të punojmë shumë për t’u treguar me shembull të gjithë fqinjëve tanë se anëtarësimi në BE është një histori e gjallë dhe e suksesshme e bazuar në arritjen e rezultateve të mira”, tha ai.
Spajiq më tej shtoi se qëllimi nuk është vetëm të bëjmë detyrat e shtëpisë kur bëhet fjalë për përmbushjen e standardeve, por ta afrojmë realisht Malin e Zi me standardet dhe vlerat evropiane në çdo kuptim.
Plani i ri i rritjes për Ballkanin Perëndimor është, siç beson ai, një shans që tregu ynë prej gjysmë milioni banorësh të bëhet pjesë e atij evropian njëmijë herë më të madh, me gjysmë miliardë banorë.
“Ndërsa siguria e anëtarësimit tonë në BE rritet, pasiguria e tregut zvogëlohet dhe investimet janë më të mëdha, më të qëndrueshme dhe vijnë nga investitorë gjithnjë e më të besueshëm. Ky është një shans që sigurisht do ta shfrytëzojmë”, tha kryeministri i Malit të Zi, Millojko Spajiq.
