Mali i Zi ka bërë progres të mirë dhe është mesatarisht i gatshëm për zhvillimin e një ekonomie tregu funksionale. „Pasi kaloi një recesion të mprehtë në vitin 2020, ekonomia regjistroi një rikuperim të fortë në vitin 2021 dhe vazhdoi të rritet me një ritëm të qëndrueshëm në gjysmën e parë të 2022,“ tregoi Komisioni Evropian (KE). Kështu thuhet në dokumentin “Progresi drejt përmbushjes së kritereve ekonomike për anëtarësim në BE: Vlerësimet e Komisionit Evropian për vitin 2022”, i cili është publikuar në faqen e KE-së. Siç u theksua, pasojat e agresionit rus ndaj Ukrainës deri më tani kanë qenë të kufizuara, pavarësisht nga kontributi shumë i rëndësishëm i këtyre dy vendeve në turizmin malazez në të kaluarën. I nxitur nga rritja e çmimeve globale të mallrave, thotë dokumenti, inflacioni është rritur ndjeshëm. KE thotë se në vitin e ardhshëm, për të përmirësuar funksionimin e ekonomisë së tregut, Mali i Zi duhet të zbatojë një plan afatmesëm të konsolidimit fiskal që synon uljen e mëtejshme të borxhit publik. Një konsensus i gjerë mbi bazat kryesore të politikës ekonomike është ruajtur, pavarësisht ndryshimeve në qeveri. KE thekson se dy qeveritë e fundit kanë riafirmuar angazhimin e tyre të fortë në rrugën drejt BE-së dhe reformat ekonomike të lidhura me to.
