Situata në Ballkanin Perëndimor nuk është veçanërisht e mirë, tha Përfaqësuesi i Lartë për Punët e Jashtme Joseph Borell përpara një takimi të ministrave të jashtëm të BE-së. Komisioneri i Zgjerimit Oliver Varheli theksoi se politika e zgjerimit është instrumenti më i fortë. Gjatë diskutimit, ministrat do t’i kushtojnë më shumë vëmendje situatës në BeH dhe dialogut ndërmjet Beogradit dhe Prishtinës. Situata në Ballkanin Perëndimor, së bashku me Bjellorusinë, është tema kryesore e takimit të ministrave të jashtëm të BE-së. Ministri i Jashtëm evropian Joseph Borell nuk është i kënaqur me zhvillimin e situatës në rajon. Në Bosnje dhe Hercegovinë ka tendenca që cenojnë unitetin e vendit dhe pengojnë zhvillimin e tij dhe rrugën drejt BE-së. “Do të flasim për dialogun ndërmjet Beogradit dhe Prishtinës, por edhe për situatën në Ballkanin Perëndimor në përgjithësi, nuk është veçanërisht e mirë”, tha ai. Komisioneri Evropian për Zgjerimin Oliver Varheli tha se Ballkani Perëndimor nuk është vetëm zgjerim, por edhe bashkim i vendeve të rajonit me synimet e politikës së jashtme të BE-së. “Ne duhet të vazhdojmë politikën e zgjerimit, që është instrumenti ynë më i fortë dhe shpresojmë të shohim përparim pas zgjedhjeve në Bullgari dhe Maqedoninë e Veriut,” tha Varheli. Ai theksoi se temë e rëndësishme është edhe Plani Evropian për Investime, për zbatimin e të cilit duhet të punohet sa më shpejt.
