Mali i Zi duhet të ofrojë arsim cilësor për të gjithë fëmijët, pasi ky është çelësi për uljen e varfërisë në vend, tha kreu i zyrës përfaqësuese të UNICEF-it në Mal të Zi, Juan Santander. Në prezantimin e analizës gjithëpërfshirëse të sektorit të arsimit në Mal të Zi, ai tha se UNICEF ka më shumë se shtatë dekada që mbështet qeveritë në mbarë botën për t’i ofruar çdo fëmije arsim cilësor dhe gjithëpërfshirës. Ai theksoi se dy nga tre fëmijë në Mal të Zi janë në shkolla fillore me infrastrukturë të pamjaftueshme dhe se në shkollat fillore dhe të mesme ka mesatarisht 16 nxënës që përdorin një kompjuter. “Këto të dhëna tregojnë se fondet duhet të sigurohen urgjentisht për të financuar objektet e reja shkollore dhe për të pajisur në mënyrë adekuate të gjitha shkollat me teknologji të reja,” tha Santander. Ai theksoi se investimi i më shumë mjeteve në aftësimin e vazhdueshëm profesional të të gjithë mësimdhënësve është prioritet, nëse duam një arsim më cilësor. “Fëmijët që rriten në varfëri kanë shumë më pak gjasa të shkojnë në kopshtin e fëmijëve, shkollën fillore dhe shkollën e mesme,” tha Santander. Ai deklaroi se analizat në mbarë botën tregojnë se arsimimi është rruga për të dalë nga varfëria. “Prandaj, për të reduktuar varfërinë në Mal të Zi, arsim cilësor duhet t’u ofrohet të gjithë fëmijëve nga familjet e varfra dhe fëmijëve me aftësi të kufizuara zhvillimore, që nga vitet e para të jetës,” vuri në dukje Santander.
