Në Ministrinë e Arsimit, Shkencës dhe Inovacionit është nënshkruar kontrata me Ministrinë e Energjisë në kuadër të programit për efiçiencë energjetike përmes së cilës do të shpenzohen rreth 10 milionë euro për rindërtimin e katër shkollave.
Siç thonë ata, vlera e kontratës është 9.637.779 euro pa TVSH, punimet do t’i kryejë Konsorciumi Ramel, Gradnja dhe Ening, ndërsa kontratën e ka nënshkruar ministri i Energjetikës në Qeverinë e Malit të Zi, Sasha Mujoviq.
Ministri Mujoviq thekson se çdo kilovat energji elektrike apo ujë i kursyer përmes përmirësimit të efiçencës energjetike është ndoshta më i vlefshëm se ai i prodhuar dhe se është prioritet i Ministrisë së Energjisë, ndërsa objektet publike të përfshira në këtë projekt kanë potencial të madh.
“Përveç masave për efiçencën e energjisë, shkollat që janë pjesë e kësaj kontrate do të rikonstruktohen dhe përmirësohen në aspektin e komoditetit, gjë që do të përmirësojë kushtet e jetesës dhe mësimit të fëmijëve tanë,“ theksoi Mujoviq.
Ministrja e Arsimit, Shkencës dhe Inovacionit, Angjella Jakshiq-Stojanoviq, falënderoi ministrin Mujoviq dhe kolegët e tij për punën e përkushtuar në realizimin e këtij projekti.
“Falë realizimit të këtij projekti, në këtë fazë do të rikonstruktohen tërësisht katër shkolla në Mal të Zi, që do të mundësojë kushte shumë më të mira për shkollimin e tyre. Fëmijët do të jenë bartësit kryesorë të ndryshimit të ndërgjegjësimit për përdorimin e energjisë. Kjo është arsyeja pse instalimi i paneleve diellore në shkolla dhe kopshte do të jetë një hit i vërtetë sepse, përveç përfitimeve të tjera, fëmijët tanë të shohin se çfarë është zhvillimi i qëndrueshëm në veprim, pa folur për përfitimet e kursimit të energjisë që sjell ky program”, tha ministrja Jakshiq-Stojanoviq.
