Foto: Shutterstock
Kryetari i Komunës së Ulqinit, Genci Nimanbegu, ka deklaruar për TV Vijesti se këtë sezonë turistike është regjistruar një përmirësim në arkëtimin e taksës së qëndrimit, por edhe një rënie të numrit të turistëve krahasuar me verën e kaluar.
“Deri më 11 korrik kemi një arkëtim më të mirë të taksës së qëndrimit, me një rritje prej rreth 10 për qind. Bëhet fjalë për një shumë prej 280.000 eurosh. Nga ana tjetër, gjatë korrikut kemi një rënie të numrit të turistëve prej 8 për qind. Megjithatë, që nga e shtuna e fundit, sidomos dje, kemi vërejtur fluks më të madh vizitorësh dhe më shumë turma në qytet. Shifra prej më pak se 20.000 turistësh që u raportua të enjten është tejkaluar, dhe do të thosha se aktualisht Ulqini ka rreth 30.000 turistë,” tha Nimanbegu.
Sa i përket çmimeve të plazheve, ai theksoi se qiraja për pajisjet plazhore varion nga 10 deri në 40 euro. Këtë verë, me kërkesë të Komunës, në Plazhin e Vogël është lënë një hapësirë pa mobilje plazhi, e lirë për pushuesit. Megjithatë, edhe në komunën më jugore të vendit ka ende plazhe të paorganizuara për këtë sezon.
“Deri tani kemi dhënë 38 leje për plazhe dhe, krahasuar me komunat e tjera bregdetare, kemi qenë mjaft efikasë. Megjithatë, kemi pasur vështirësi për shkak të shpalljes së vonuar të tenderëve, siç kishim paralajmëruar para fillimit të sezonës. Kemi identifikuar të paktën shtatë plazhe që nuk janë të gatshme. Një nga më të bukurat, Valdanosi, aktualisht është pa qiramarrës,” deklaroi ai.
Nimanbegu shtoi se shpreson që plazhi i Valdanosit të jetë gati për të pritur turistët duke filluar nga muaji gusht.
