Foto: NPR
Lideri kinez, Xi Jinping, tha se nuk ka fitues në luftën me tarifa, ndërsa Pekini dhe Uashingtoni kanë ndëshkuar me taksa të larta importet e njëri-tjetrit.
Xi ka nisur turneun e tij në Azinë Juglindore me vizitën në Vietnam më 14 prill, duke sinjalizuar se Kina është e përkushtuar për tregtinë globale, pasi tarifat e vendosura nga presidenti amerikan, Donald Trump, tronditën ekonominë botërore.
Edhe pse Trump ka pezulluar zbatimin e disa tarifave, tarifat ndaj Pekinit prej 145 për qind kanë mbetur në fuqi. Kina i është kundërpërgjigjur SHBA-së, duke vendosur po 145 për qind tarifë ndaj importeve amerikane.
“Nuk ka fitues në një luftë tregtare apo në një luftë me tarifa”, shkroi X në një editorial që është publikuar në mediat shtetërore të Vietnamit dhe Kinës.
“Shtetet tona duhet të mbrojnë me vendosmëri sistemin multilateral të tregtisë, zinxhirët industrialë dhe të furnizimit globalë si dhe mjedisin e hapur dhe bashkëpunues ndërkombëtar”.
Presidenti kinez do të zhvillojë vizitë dyditore në Vietnam.
Ndërsa kjo vizitë me gjasë është planifikuar më herët, ajo është bërë e rëndësishme për shkak të luftës me tarifa mes Kinës dhe SHBA-së, dy ekonomive më të mëdha në botë.
Vietnami ka përvojë në balancimin e raporteve me SHBA-në dhe Kinën.
Ndërsa shteti udhëhiqet nga një sistem komunist njëpartiak sikurse edhe Kina, ai ka marrëdhënie të forta me SHBA-në.
Më 2023, Vietnami ishte shteti i vetëm që mirëpriti presidenti amerikan, Joe Biden, dhe atë të Kinës, Xi Jinping.
Edhe Vietnami është goditur nga tarifat e vendosura nga Trumpi në fillim të prillit.
Ndaj këtij shteti, Uashingtoni ka vendosur tarifë prej 46 për qind për mallrat, por tarifat janë pezulluar për 90-ditë nga Trump.
Pas Vietnamit, Xi Jinping pritet të qëndrojë në Malajzi dhe Kamboxhia.
