Presidenti i Malit të Zi, Jakov Millatoviq, ka vlerësuar se dialogu social në Mal të Zi ka dështuar.
“Me siguri mund të konkludohet se dialogu social në Mal të Zi ka dështuar. Seanca e djeshme e Këshillit Social e zvogëloi dialogun në votim të thjeshtë elektronik. Pra, nuk ka pasur konsensus, por edhe rekomandim formal të Këshillit Social, si rezultat institucional i dialogut dhe marrëveshjes së partnerëve social”, tha Millatoviq.
Ai tha gjithashtu se në Mal të Zi ka një pakuptimësi të veprimit institucional në kurriz të politikës afatshkurtër dhe dritëshkurtër.
“Është mirë që të punohet në rritjen e pagave dhe standardit jetësor të qytetarëve dhe kjo është punë e të gjithë vendimmarrësve me qëllime të mira. Por nuk është mirë që më shumë se 100 milionë euro synohen të merren nga të ardhurat bruto të qytetarëve nga Fondi PIO dhe të transferohen tek kompanitë që kanë realizuar fitime rekord, në të njëjtën kohë duke zhvendosur barrën dhe duke zvogëluar konkurrencën e familjeve, ndërmarrjeve të vogla dhe mikro”, theksoi Millatoviq.
Presidenti thekson gjithashtu se në të njëjtën kohë, nuk është mirë që “ky deficit në financat publike synohet të kompensohet me një rritje të TVSH-së dhe detyrimeve të tjera, që ndikojnë drejtpërdrejt në rritjen e çmimeve”.
„Në fund të fundit, nuk është mirë që rritja e çmimeve do ta hajë tërësisht rritjen e paralajmëruar të pagave prej 6%, duke i lënë qytetarët me probleme edhe më të mëdha se ato me të cilat po përballen aktualisht”, tha presidenti.
Ai bëri apel që për shkak të pikave të vogla partiake, të cilat tashmë janë dukshëm të kufizuara, sistemi i solidaritetit ndërgjeneror i ndërtuar me dekada të mos shembet dhe të mos luhet me të ardhmen e qytetarëve.
