Brukseli ka përshëndetur vizitën e parë të presidentit serb Aleksandar Vuçiç në Ukrainë, duke e konsideruar atë si një sinjal pozitiv në rrugën drejt pajtimit dhe bashkëpunimit rajonal.
Megjithatë, zyrtarët evropianë i kanë rikujtuar Serbisë nevojën për t’u përputhur me qëndrimin e Bashkimit Evropian, që prej fillimit të konfliktit ka vendosur sanksione të rënda ndaj Moskës.
Zëdhënësi i Komisionit Evropian, në një deklaratë pas samitit të liderëve të Evropës Juglindore në Odesa, ku Vuçiç nuk e nënshkroi deklaratën e përbashkët që kërkon tërheqjen e plotë të forcave ruse nga territori ukrainas, theksoi rëndësinë e bashkimit të vendeve aspirante në qëndrimet e BE-së.
“E mirëpresim vizitën e presidentit Vuçiç në Ukrainë, një sinjal pozitiv në këtë kohë sfidash,” tha ai.
“Por presim që Serbia të jetë në një linjë të qartë me ne në dënimin e agresionit rus dhe të mbështesë nismat për një armëpushim pa kushte, siç ka kërkuar edhe presidentja Ursula von der Leyen. Një armëpushim 30-ditor do të ishte një hap i mirëpritur për të reduktuar viktimat civile dhe për të hapur rrugën drejt një paqeje të qëndrueshme.”
Në fjalimin e tij gjatë samitit në Odesa, i cili shënoi vizitën e parë zyrtare të Vuçiç në Ukrainë, presidenti serb theksoi se Serbia dëshiron të shkojë përtej fjalëve, duke ofruar ndihmë praktike në rindërtimin e vendit të shkatërruar nga lufta.
Kjo vizitë vjen në një kohë kur Vuçiç përpiqet të ruajë një qëndrim neutral në konfliktin midis Rusisë dhe Ukrainës, ndërsa synon të avancojë aspiratat e Serbisë për anëtarësim në Bashkimin Evropian.
Megjithatë, qëndrimet e tij janë shpesh në qendër të kritikave, pasi Vuçiç ishte një nga pak udhëheqësit evropianë që mori pjesë në festimet e Ditës së Fitores në Moskë më 9 maj, një veprim që shkaktoi reagime të ashpra nga Brukseli.
Tensionet midis Beogradit dhe Moskës janë rritur së fundmi, pas akuzave të shërbimeve ruse të inteligjencës më 29 maj, që pretenduan se disa kompani serbe të mbrojtjes furnizojnë në mënyrë indirekte armë për Ukrainën. Vuçiç ka mohuar me forcë këto pretendime, duke theksuar se Serbia qëndron në një vijë të balancuar në këtë konflikt të ndjeshëm.
