Foto: Qeveria e Malit të Zi / Vlada Crne Gore
Nisma për t’u dhënë vendeve kandidate për anëtarësim në BE mundësinë që të integrohen në tregun unik evropian tashmë po jep rezultatet e para, deklaroi guvernatorja e Bankës Qendrore të Malit të Zi, Irena Radoviq, pas pjesëmarrjes në takimin vjetor të Dialogut Ekonomik dhe Financiar me partnerët nga rajoni, i cili u mbajt në Bruksel.
“Mali i Zi u bë anëtari i parë që u integrua në Zonën e Vetme të Pagesave në Euro (SEPA) në nëntor të vitit të kaluar. Më vjen shumë mirë që mund të deklaroj në këtë moment se, deri më sot, 93% e tregut tonë bankar është i integruar – 93% kanë dorëzuar aplikimet e tyre, kanë marrë dritën e gjelbër nga Këshilli Evropian i Pagesave – dhe se në tetor i gjithë tregu bankar i Malit të Zi do të jetë tërësisht i integruar,” njoftoi guvernatorja Radoviq.
Ajo theksoi se që nga 19 maji fillon pastrimi online me standardin ISO 222 tërësisht të zbatuar, megjithëse afati për zbatimin në Bashkimin Evropian është në nëntor të vitit 2025.
“Mali i Zi ka nxituar dhe ka treguar se mundet dhe di,” tha Radoviq.
Guvernatorja shtoi gjithashtu se qytetarët dhe ekonomia e Malit të Zi, nga 20 korriku i vitit të ardhshëm, do të kenë mundësinë të përdorin pagesa të menjëhershme (instant payment) përmes sistemit evropian TIPS (TARGET Instant Payment Settlement), përkatësisht një versioni të tij – TIPS klon.
Ajo thekson se është optimiste sa i përket anëtarësimit të Malit të Zi në Bashkimin Evropian deri në vitin 2028 dhe se beson që struktura negociuese e Malit të Zi, institucionet malazeze dhe shoqëria në tërësi, e shikojnë me shumë entuziazëm periudhën që na pret përpara, dhe natyrisht, edhe dinamikën e mbylljes së kapitujve deri në fund të vitit 2026.
