Nëse Qeveria dhe ministritë përkatëse nuk gjejnë urgjentisht një mënyrë për të ndihmuar Institutin Igallo, ai institucion nuk do të mund të pranojë pacientë nga java e ardhshme, u njoftua sot në një konferencë të përbashkët për shtyp.
Punonjësit e atij institucioni nuk kanë marrë tre rroga, dhe personeli mjekësor mbi të cilin mbështetet aktiviteti bazë i Institutit po largohet çdo ditë.
Kryetarja e sindikatës së Institutit, Dr. Marija Obradoviq, tha se agonia e punëtorëve vazhdon pa shpresë se do të përfundojë së shpejti.
Pagën e fundit të dhjetorit e kanë marrë në shkurt dhe sipas Obradoviq, nuk është ekzagjerim të thuhet se ka edhe njerëz të uritur që nuk mund të përballojnë ushqimet elementare as gjatë festave të Pashkëve.
“Punëtorët nuk e merituan, sepse edhe në këto kushte e kryejnë punën e tyre, ruajtën asetet e mëdha të Institutit dhe arritën të fitojnë sërish tenderin për tregun kërkues norvegjez. E gjithë kjo nuk mjafton për Qeverinë, e cila është pronari shumicë i Institutit, për t’i ndihmuar”, theksoi ajo.
Ajo shprehu frikën se nga java e ardhshme Instituti nuk do të mund t’i pranojë pacientët, para së gjithash për shkak të borxheve të grumbulluara, e më e rëndësishmja për shkak të zhgënjimit të përditshëm të stafit mjekësor, mbi të cilin qëndron aktiviteti kryesor i Institutit.
