Dora e drejtësisë nuk do të anashkalojë askënd, është vetëm çështja se kë do të arrijë së pari dhe kë më vonë, tha kryeministri Dritan Abazoviq.
Ai këtë e tha në seancën e Qeverisë, duke komentuar veprimet e sotme të kryera nga Prokuroria Speciale e Shtetit dhe Departamenti Special i Policisë.
“Dëshiroj të lavdëroj të gjitha veprimet e Prokurorisë Speciale të Shtetit dhe Departamentit të Policisë Speciale që kryhen në të gjithë Malin e Zi dhe që dëshmojnë se dora e drejtësisë nuk do të anashkalojë askënd,” tha Abazoviq. Ai tha se do të ketë “situata të dhimbshme”.
Këtë vit, të hyra rekord të Administratës Pyjore
Të hyrat e Drejtorisë së Pylltarisë këtë vit do t’i thyejnë të gjitha rekordet, tha ministri i Bujqësisë, Pylltarisë dhe Menaxhimit të Ujërave, Vlladimir Jokoviq, dhe shprehu pritjet që këtë vit të kalojnë 15 milionë euro.
Jokoviq tha se nga viti 2010 deri në vitin 2015-2016, Mali i Zi ka pasur një eksport të madh të trungjeve dhe halorëve, d.m.th. të drurit të rrumbullakët.
“Unë do të thosha që këtë vit Administrata e Pyjeve do të thyejë të gjitha rekordet, sigurisht që do të jenë mbi 15 milionë euro, dhe në vitin 2021 ka pasur mbi 6 milionë të hyra. Siç janë gjërat tani, ndoshta do të kalojnë 20 milionë”, tha Jokoviq dhe shprehu bindjen se përpunimi i drurit me investime të caktuara mund të ketë një peshë të konsiderueshme në ekonominë e Malit të Zi.
Ai po ashtu tha se kjo është veçanërisht e rëndësishme për veriun e Malit të Zi ku, siç tha ai, mund të punësohen një numër i konsiderueshëm i punëtorëve.
Do të shqyrtohet mundësia e huamarrjes në tregun e brendshëm
Qeveria dhe Ministria e Financave do të monitorojnë zhvillimet në tregun e kapitalit dhe do të shqyrtojnë mundësinë e huamarrjes në tregun e brendshëm, ka bërë të ditur Sekretari Shtetëror i Ministrisë së Financave, Agron Ibrahimi.
“Është e rëndësishme që Ministria e Financave dhe Qeveria të monitorojnë zhvillimet në tregun e kapitalit dhe në rast të ofertave adekuate të marrin pjesë aktive në blerjen e aksioneve. Këtu përfshihet edhe blerja e aksioneve në vetë Bursën e Malit të Zi, që do të kontribuonte edhe në prezencën institucionale të shtetit në këtë pjesë të tregut”, tha Ibrahimi në seancën e Qeverisë.
