Foto: Qeveria e Malit të Zi / Vlada Crne Gore
Ministri i Shëndetësisë, dr. Vojisllav Shimun, ka deklaruar se fëmijët dhe të rriturit me autizëm, si dhe familjet e tyre, janë në fokus të veçantë të sistemit shëndetësor, dhe se Ministria po zbaton një sërë masash konkrete për përmirësimin e qasjes, vazhdimësisë dhe cilësisë së kujdesit shëndetësor.
Në mbledhjen e Komisionit Parlamentar për Shëndetësi, me temën e problematikës së prindërve dhe fëmijëve me autizëm, ministri theksoi se po përgatitet Regjistri Kombëtar i Personave me Autizëm, i cili do të mundësojë një pasqyrë më të saktë të nevojave dhe planifikim më të mirë të shërbimeve shëndetësore në nivel kombëtar.
Ai shtoi se janë eliminuar listat e pritjes për shërbime stomatologjike dhe se po hartohet protokolli standard për sedacion dhe trajtim të personave me autizëm, që do të garantojë kushte më të sigurta e më humane për trajtim.
Me nismë të Ministrisë, qeverisë i është propozuar që Fondi i Sigurimeve Shëndetësore të mund të lidhë kontrata me specialistë vendas nga qendrat burimore dhe me logopedë, për të forcuar rrjetin e mbështetjes profesionale dhe për të reduktuar nevojën për trajtime jashtë vendit.
“Synimi ynë është që çdo fëmijë me autizëm, pavarësisht se ku jeton, të ketë qasje në diagnostikim, terapi dhe mbështetje cilësore e në kohë. Prindërit nuk duhet të mbeten vetëm, ne po ndërtojmë një sistem që i mbështet në çdo hap,” tha Shimun.
Ai theksoi gjithashtu se Strategjia e zhvillimit të hershëm po zbatohet me sukses dhe është vlerësuar nga UNICEF si shembull i praktikës së mirë në rajon. Gjithnjë e më shumë institucione po përfshihen në programet e punës ndërhyrëse të hershme, ndërsa Ministria po investon në edukimin e stafit dhe zhvillimin e ekipeve multidisiplinare.
Përmes punësimit të defektologëve, logopedëve dhe psikologëve shtesë, krijimit të kushteve të veçanta për marrjen e analizave laboratorike për fëmijët me autizëm dhe kartave të qasjes së shpejtë në shërbime shëndetësore, Ministria po tregon përkushtim ndaj një mjedisi shëndetësor të ndjeshëm dhe gjithëpërfshirës.
Në fund, ministri Shimun theksoi se kujdesi për fëmijët me autizëm nuk është vetëm çështje politike, por çështje humaniteti, solidariteti dhe përgjegjësie shoqërore, duke premtuar vazhdim të reformave në këtë drejtim.
