Të 20 personat që ndodheshin në një aeroplan transportues ushtarak turk, i cili u rrëzua në Gjeorgji teksa po kthehej nga Azerbajxhani, humbën jetën, njoftuan autoritetet turke të mërkurën, një ditë pas incidentit.
“Bashkëluftëtarët raportuan se humbën jetën kur aeroplani ynë transportues ushtarak C-130, që ishte nisur nga Azerbajxhani për t’u kthyer në Turqi, u rrëzua pranë kufirit Gjeorgji-Azerbajxhan,” tha ministri turk i Mbrojtjes, Yaser Guler, përmes një postimi në X, ku publikoi edhe 20 fotografi të viktimave.
Rrëzimi i aeroplanit ishte konfirmuar më parë nga Ministria e Mbrojtjes e Turqisë dhe Ministria e Brendshme e Gjeorgjisë.
Autoritetet thanë se aeroplani u rrëzua rreth 5 kilometra larg kufirit midis Gjeorgjisë dhe Azerbajxhanit.
Autoritetet turke dhe gjeorgjiane kanë nisur inspektimet në vendngjarje, në komunën Signagi, qarku Kakheti, Gjeorgji.
Shumë udhëheqës botërorë, përfshirë ata nga Azerbajxhani dhe Gjeorgjia, si dhe sekretari i Përgjithshëm i NATO-s, Mark Rutte, shprehën ngushëllime për këtë ngjarje.
Përmes një postimi në X, Tom Barrack, ambasadori amerikan në Stamboll, shprehu solidaritetin e Shteteve të Bashkuara me Turqinë pas rrëzimit të aeroplanit.
Lockheed Martin, kompania amerikane që prodhon avionin C-130 Hercules, shprehu ngushëllime dhe deklaroi se është e përkushtuar të ndihmojë Turqinë gjatë hetimit.
Disa video të rrëzimit të avionit kanë qarkulluar në rrjetet sociale, njëra prej të cilave tregon trupin e avionit dhe fragmentet e tij që bien në tokë të ndara në pjesë.
