Mali i Zi është i përkushtuar të kontribuojë në luftën kundër ndryshimeve klimatike, tha presidenti i Malit të Zi Jakov Millatoviq në Samitin e Kombeve të Bashkuara për Ndryshimet Klimatike COP29 në Baku.
Millatoviq tha se të dhënat e OKB-së se viti 2024 është në rrugën e duhur për t’u bërë viti më i nxehtë në histori nuk janë befasuese, duke pasur parasysh se ngrohja globale arrin përkohësisht 1.5 gradë Celsius mbi nivelin para-industrial.
“Pasojat negative të ndryshimeve klimatike po prekin gjithnjë e më shumë komunitetet në mbarë botën dhe Mali i Zi nuk bën përjashtim, i cili thekson nevojën urgjente për veprim klimatik. Si një nga nënshkruesit e parë të Marrëveshjes së Parisit, Mali i Zi krijoi një kornizë gjithëpërfshirëse legjislative dhe institucionale për mbështetjen e politikave të gjelbra gjatë dekadave të fundit”, tha Millatoviq.
Ai vuri në dukje se si vend kandidat për anëtarësim në Bashkimin Evropian, Mali i Zi harmonizon politikat e tij me BE-në dhe për këtë arsye është angazhuar të ndajë ambiciet klimatike të shprehura në Agjendën e Gjelbër për Ballkanin Perëndimor dhe arritjen e neutralitetit të karbonit deri në vitin 2050.
Ai tha se edhe Mali i Zi po përshpejton zbatimin e iniciativave për efikasitet energjetik, veçanërisht brenda institucioneve publike, dhe këto përpjekje mbështeten nga organizata të mëdha financiare ndërkombëtare që veprojnë në vend dhe rajon.
Millatoviq përmendi se në rrugën drejt neutralitetit të karbonit, ne duhet të mbetemi të përkushtuar ndaj një tranzicioni të drejtë dhe se në këtë kuptim, Mali i Zi po zhvillon një Udhërrëfyes për një tranzicion të drejtë në mënyrë që të maksimizojë përfitimet dhe të minimizojë rreziqet socio-ekonomike në transformimin drejt ekonomisë së gjelbër.
“Koha është burimi më i çmuar në dispozicionin tonë dhe çdo ditë është thelbësore në përpjekjet tona kolektive drejt një ekonomie rezistente ndaj klimës. Bashkëpunimi është thelbësor në këtë përpjekje. I ftoj të gjithë të largohen nga ky tubim me një ndjenjë të përtërirë përkushtimi dhe vendosmëri të vërtetë për të vepruar, dhe Mali i Zi mbetet fort i përkushtuar për arritjen e qëllimeve të neutralitetit të karbonit, të udhëhequr nga fryma e përpjekjes së përbashkët dhe solidaritetit”, theksoi Millatoviq.
