Regjistrimi në Malin e Zi nuk mund të organizohet deri në fund të vitit, sepse nuk ka kushte teknike për këtë, tha zëvendëskryeministri Dritan Abazoviq. Pas konferencës për shtyp të Këshillit Kombëtar për Luftën kundër Korrupsionit në nivel të lartë, ai tha se së pari duhet të krijohen disa kushte për të kryer regjistrimin. Duke komentuar mesazhin e Frontit Demokratik se, nëse nuk ka regjistrim, nuk do të ketë as Qeveri, ai tha se nuk është hera e parë që ata dërgojnë mesazhe të tilla nga ajo parti politike. “Nëse të gjitha organet shtetërore arrijnë të përgatisin gjithçka, unë nuk kam asgjë kundër, por me të vërtetë mendoj se kjo mundësi nuk ekziston tani, katër muaj para fundit të vitit,” tha Abazoviq. I pyetur nëse e ka parë Marrëveshjen Themelore me Kishën Ortodokse Serbe, ai u përgjigj pozitivisht. Sipas tij, gjithçka që nuk ishte e mirë në atë dokument është korrigjuar. “Interesat e Malit të Zi janë absolutisht të mbrojtura. Ne jemi duke pritur për të parë finalen, nëse është kështu, atëherë unë mendoj se nuk do të ketë probleme,” theksoi Abazoviq.
