Foto: Qeveria e Malit të Zi / Vlada Crne Gore
Nënkryetari i Qeverisë për Sistemin Politik, Drejtësinë dhe Luftën kundër Korrupsionit, Momo Koprivica, kryesoi mbledhjen e dytë të Këshillit për Sundimin e Ligjit, ku u theksua progresi në zbatimin e vendimeve nga mbledhja e parë dhe nevoja për përmirësim të kushteve në sistemin gjyqësor dhe prokurori.
Koprivica vlerësoi se janë bërë hapa përpara në disa fusha, përfshirë sigurimin e hapësirave për institucionet gjyqësore dhe përfshirjen e Malit të Zi në Planin e Veprimit të Stambollit për luftën kundër korrupsionit.
Gjithashtu, u theksua progresi në zbatimin e rekomandimeve të GRECO-s.
Në mbledhje u analizuan edhe vlerësimet paraprake nga dokumenti jozyrtar (“non-paper”) i Komisionit Evropian për kapitujt 23 dhe 24, me qëllim përgatitjen për mbylljen e këtyre kapitujve deri në fund të vitit 2026.
Këshilli theksoi rëndësinë e zbatimit të menjëhershëm të rekomandimeve të KE-së, në veçanti ato që lidhen me forcimin e sistemit gjyqësor, luftën kundër korrupsionit dhe ruajtjen e pavarësisë institucionale.
Po ashtu, në mbledhje u konstatua se disa prej rekomandimeve kërkojnë edhe ndryshime kushtetuese – dhe se Ministria përkatëse ka filluar hapat e parë në këtë drejtim.
Këshilli shqyrtoi zbatimin e planeve të veprimit për përmbushjen e kritereve për kapitujt 23 dhe 24, të miratuara nga Qeveria më 25 prill 2025, duke kërkuar angazhim të shtuar të institucioneve për përmbushjen sa më të shpejtë të detyrimeve ndaj procesit të integrimit evropian.
