Foto: Qeveria e Malit të Zi / Vlada Crne Gore
Shtetet e Bashkuara dhe Mali i Zi kanë njoftuar se do të fillojnë bisedime për një marrëveshje dypalëshe me qëllim forcimin e lidhjeve tregtare, investimeve dhe ekonomike, në kuadër të Dialogut Ekonomik SHBA-Mali i Zi 2025.
Ambasada amerikane në Podgoricë thekson se SHBA-të janë të njohura globalisht për inovacionin dhe besueshmërinë ekonomike, dhe se kompanitë amerikane po tregojnë interes të rritur për mundësi biznesi në ekonominë në rritje të Malit të Zi.
Qëllimi i këtyre bisedimeve është të incentivohet investimi i sektorit privat amerikan, të krijohen vende të reja pune në SHBA dhe Mal të Zi, të forcohet roli i Malit të Zi si aleat i NATO-s dhe të hapen mundësi të reja për prosperitet rajonal.
Në 9 muajt e fundit, Mali i Zi ka nënshkruar katër marrëveshje ndërqeveritare – me Francën, Hungarinë dhe dy me Emiratet e Bashkuara Arabe – të cilat lejojnë zgjedhjen e kontraktorëve pa tender publik, duke shmangur pjesërisht legjislacionin kombëtar për prokurimet publike.
Sipas ekspertëve, kjo praktikë mund të rrezikojë transparencën dhe kontrollin kundër korrupsionit, pasi marrëveshjet ndërqeveritare shpesh përjashtojnë ligjin kombëtar dhe i japin qeverisë rrugë të shpejta për investime, pa kaluar përmes procedurave të ndërlikuara të buxhetit ose financimeve nga BE-ja.
Marrëveshjet me Emiratet fokusohen në turizëm, prona, energjetikë dhe teknologji digjitale, ajo me Hungarinë në infrastrukturën digjitale dhe IT, ndërsa marrëveshja me Francën kombinon projekte infrastrukturore, energjetike dhe digjitale.
Raporti i fundit i Komisionit Evropian thekson nevojën që Mali i Zi të sigurojë se këto marrëveshje nuk bien ndesh me ligjet e BE-së për prokurimet publike, dhe se zbatimi i tyre do të jetë nën vëzhgimin e rreptë të BE-së.
