Forca e Re Demokratike shpreh shqetësim dhe dënon demonstrimin e politikës serbomadhe në pikën kufitare Hani i Hotit – Bozhaj më 8 shtator 2024.
„Kjo është përpjekje për të destabilizuar situatën në Mal të Zi, në të cilën shqiptarët nuk ranë pre. Vetë akti nuk meriton asnjë koment, por heshtja e administratës e meriton. Në Bozhaj autoritetet ligj zbatuese lejuan këtë demonstrim, duke provokuar në mënyrë të panevojshme Republikën e Shqipërisë, një anëtare e besueshme e aleancës së NATO-s me të cilën Mali i Zi, të paktën zyrtarisht, pretendon të ketë marrëdhënie miqësore dhe fqinjësore dhe që gjatë vitit 2023 qytetarët e Malit të Zi bënë 636,000 vizita. Sigurisht, ky akt nuk kërcënon sigurinë e Republikës së Shqipërisë dhe aq më pak të Republikës së Kosovës. Mirëpo, ajo që bëjnë këto dhe demonstrata të ngjashme është minimi i subjektivitetit dhe integritetit ndërkombëtar të Malit të Zi si anëtar i Aleancës së NATO-s,“ thuhet në deklaratën e Forcës.
Ata më tej shtojnë se „është e qartë se me këtë akt ky grup joformal ka shprehur ndjenja sentimentale joformale dekadash, madje edhe shekullore të grupeve të caktuara politike në Serbi. Megjithatë, heshtja e administratës për këtë është një shenjë e miratimit apo mbështetjes zyrtare për përhapjen e vullnetit politik të Beogradit. Prandaj, ftojmë zyrtarisht Kryeministrin, i cili drejton politikën e brendshme dhe të jashtme, të distancohet qartë nga veprime të tilla dhe të tregojë qartë se me asnjë veprim apo mosveprim të autoriteteve shtetërore në të ardhmen nuk do të mundësohet shprehje e ngjashme armiqësie apo devijimi nga qëndrimet e politikës së jashtme për njohjen e Kosovës, marrëdhëniet e fqinjësisë së mirë me të gjitha vendet dhe pjesëmarrjen aktive në Aleancën e NATO-s.“
„Duke bërë thirrje që diçka të kthehet dhe se dikush do të kthehet, në mënyrë të pashmangshme çon në rikthimin e episodeve famëkeqe nga e kaluara, ku ne, shqiptarët ishim viktima. Megjithatë, populli shqiptar në Mal të Zi, Shqipëri, Kosovë, Maqedoninë e Veriut dhe në Serbi nuk shikon nga e kaluara, por nga një e ardhme më e mirë për qytetarët e të gjitha vendeve të Ballkanit. Për atë të ardhme, punohet shumë individualisht dhe kolektivisht, në vatrat tona dhe në diasporë, vitale dhe të gatshëm me mësimet e nxjerra nga e kaluara,“ përfundon deklarata e Forcës së re Demokratike.
