Foto: Qeveria e Malit të Zi / Vlada Crne Gore
Kryeministri i Malit të Zi, Millojko Spajiq, ka deklaruar se Mali i Zi dëshiron anëtarësimin në Bashkimin Evropian më shumë për arsye sigurie sesa për arsye tradicionale “fiskale”.
Duke folur në Forumin “European Pulse” të Politico-s, Spajiq tha se në të kaluarën procesi i afrimit me BE-në ishte i lidhur kryesisht me mbështetjen financiare për infrastrukturën, por kjo nuk është më rasti.
Sipas tij, Mali i Zi, i cili ka filluar negociatat e anëtarësimit në vitin 2012 dhe konsiderohet si kandidati më i avancuar, synon të hyjë në BE edhe për shkak të natyrës së saj si “projekt paqeje”.
“Arsyet kryesore pse duam në BE janë vlerat e përbashkëta në të cilat të gjithë besojmë, pastaj tregu i vetëm, gjysmë miliard njerëz kundrejt gjysmë milioni malazezëve,” tha Spajiq.
“Dhe së treti, është një projekt paqeje, ndoshta edhe projekti i fundit i paqes në botën e sotme, dhe kjo është vlera e Bashkimit Evropian.”
Ai shtoi se në mbarë Evropën, vendet jashtë BE-së nga Islanda deri te Moldavia po shprehin gjithnjë e më shumë interes për t’u bashkuar me bllokun për arsye sigurie, veçanërisht pas pushtimit rus të Ukrainës në vitin 2022 dhe deklaratave të Donald Trump për Greenlandën.
Sipas raportit të Politico-s, Mali i Zi është kandidati më i përparuar në procesin e zgjerimit, duke mbyllur 14 nga 33 kapitujt negociues.
Megjithatë, disa vende anëtare të BE-së mbeten skeptike ndaj zgjerimit dhe kërkojnë reforma të brendshme të vendimmarrjes në Union.
Spajiq tha se Podgorica, e cila synon anëtarësimin në BE deri në vitin 2028, është “në 80 deri 90 për qind të rrugës” për mbylljen e kapitujve të mbetur dhe shprehu besim se kjo mund të përfundojë deri në fund të vitit 2026.
“Në disa nga gjërat që po bëjmë tani, reformat që po zbatojmë, janë absolutisht pa precedent,” tha Spajiq.
