Foto: predsjednik.me
Presidenti i Malit të Zi, Jakov Millatoviq, u ka dërguar një letër deputetëve të Kuvendit, duke i kërkuar të mos votojnë për Ligjin për ndryshime dhe plotësime të Ligjit për tatimin mbi pasuritë e paluajtshme. Ai thekson se ky ligj është në kundërshtim me Kushtetutën dhe se tatimi nuk është çështje lokale.
Millatoviq argumenton se:
- Ligji i propozuar u jep komunave kompetencën të vendosin në mënyrë të pavarur për përqindjen e uljes së tatimit për bujqit, gjë që do të sillte diskriminim të tatimpaguesve, varësisht nga komuna ku ndodhet prona e tyre.
- Mund të ndodhin raste ku dy bujq, fqinj me njëri-tjetrin por në komuna të ndryshme, të paguajnë taksa shumë të ndryshme – deri në pesëfishin e shumës.
- Kjo sjellje shkel parimet e barazisë dhe ndalimit të diskriminimit të garantuara me Kushtetutë.
- Ligji gjithashtu cenon nenin 142, paragrafi 3 i Kushtetutës, i cili ndalon transferimin e kompetencave për çështje të tatimeve në pushtetin lokal.
- Dispozitat e reja janë në kundërshtim edhe me Ligjin për administratën tatimore, për shkak të mundësisë së zbatimit retroaktiv, që krijon pasiguri ligjore.
- Ministria e Financave ka vlerësuar se ligji është i dëmshëm për qëndrueshmërinë fiskale të komunave dhe nuk përputhet me politikat fiskale të qeverisë.
Në fund të letrës, presidenti Millatoviq apelon te deputetët që të mos e mbështesin ligjin, duke i paralajmëruar për pasoja të dëmshme juridike, ekonomike dhe institucionale, nëse ai miratohet.
