Drejtoria për Projekte Kapitale, me iniciativë të Ministrisë së Shëndetësisë, shpalli tender për zhvillimin e projektit kryesor për Qendrën Shëndetësore në City Kvart.
Ministri i Shëndetësisë, Dr. Vojisllav Shimun, theksoi se çdo hap deri në këtë fazë është përgatitur me vëmendje të veçantë dhe shpejtësi të madhe.
Siç theksoi ai, qytetarët e kësaj zone dhe vendbanimeve përreth, të cilat numërojnë disa mijëra banorë, për një kohë të gjatë në mënyrë të pajustifikueshme kanë qenë pa kujdes adekuat shëndetësor në afërsi të tyre.
“Më në fund po shkojmë në drejtim të krijimit të projektit kryesor. Besoj se çdo procedurë e mëvonshme do të jetë më e shpejtë dhe më efikase, në mënyrë që të arrijmë në realizimin përfundimtar – ndërtimin e qendrës shëndetësore më moderne dhe më të madhe në kryeqytet dhe në Mal të Zi”, tha Shimun.
Afati për zhvillimin e projektit kryesor është gjashtë muaj, pas të cilit planifikohet të fillojë ndërtimi në vitin e ardhshëm.
Sipas zgjidhjes konceptuale, është vlerësuar se ndërtimi i objektit bashkë me pajisjet do të kushtojë pak më pak se 30 milionë euro.
Qendra shëndetësore me të gjitha ambientet e nevojshme do të projektohet si qendrore për zonën e kryeqytetit dhe do të jetë objekti më i madh i këtij lloji në Mal të Zi.
