Nga e hëna, çmimet e karburanteve në Mal të Zi mund të jenë më të larta me mbi 20 cent për litër, sipas të dhënave të djeshme nga bursa dhe kursi i këmbimit dollar-euro dhe deri atëherë Kuvendi nuk mund të miratojë një ligj që do t’i lejonte qeverisë uljen e taksave të akcizës. Çmimi i naftës në bursat ndërkombëtare ka kaluar dje 130 dollarë për fuçi, për të arritur në 127 në fund të ditës, pra 30 dollarë më i lartë se dhjetë ditë më parë kur u rregulluan çmimet aktuale të karburanteve në Mal të Zi. Një rritje e tillë e çmimeve të karburanteve do të shkaktonte rritje të çmimeve të mallrave dhe shërbimeve të tjera.
