Ligji për tarifat ndërbankare dhe rregullat e veçanta të biznesit për kartat e pagesave, i cili do të zbatohet nga sot – 9 janar, rregullon plotësisht tregun e kartave të pagesave.
Kjo duke vendosur të drejta, detyrime dhe mundësi të barabarta për të gjithë pjesëmarrësit, ndërsa kufizimi i shumës së tarifave ndërbankare kontribuon në uljen e kostove për transaksionet e pagesave të bazuara në kartat e pagesave, thuhet në një deklaratë të Bankës Qendrore të Malit të Zi.
Siç sqarojnë ata, rregullorja e re trajton çështjen e tarifave ekzistuese të ndryshme ndërbankare për kartat e pagesave dhe përcakton kufirin e shumës së tarifave ndërbankare.
“Në vend të 0,3% deri në 2,30% aktual për pagesat me kartë debiti, bankat nuk do të lejohen t’u ngarkojnë tregtarëve një tarifë ndërbankare më të lartë se 0,2% e vlerës së transaksionit, ose 0,3% për pagesat me kartë krediti. Pritet që ky kufizim të sjellë uljen e tarifave tregtare, gjë që në mënyrë indirekte do të krijojë parakushtet për uljen e çmimeve të mallrave dhe shërbimeve për konsumatorët”, thuhet në njoftim.
Ligji i ri do të sigurojë gjithashtu krahasueshmërinë e tarifave që përbëjnë tarifën e tregtarit, si dhe transparencë më të madhe në marrëdhëniet e biznesit midis bankës-tregtarit-konsumatorit, pra informacion më të mirë të konsumatorit, me stimulim shtesë të përdorimit të pagesave pa para në dorë.
“Efektet pozitive të ligjit të ri do të ndjehen edhe nga tregtarët, veçanërisht bizneset e vogla dhe të mesme, të cilët për shkak të transparencës më të madhe dhe tarifave më të ulëta ndërbankare do të mund të negociojnë me bankat e tyre për uljen e tarifave totale tregtare,” thuhet në njoftim.
