Trupat e Koresë së Veriut të dislokuara në rajonin e Kurskut, në Rusi, kanë luftuar me forcat e Kievit në fushën e betejës, tha të enjten presidenti ukrainas Volodymyr Zelensky, duke shtuar se përleshjet rezultuan me viktima.
Zelensky tha se 11,000 ushtarë të Koresë së Veriut ndodhen në rajon, ku inkursioni ushtarak tre-mujor i Ukrainës në territorin rus ka ngecur.
“Njëmbëdhjetë mijë ushtarë të Koresë së Veriut ose ushtarë të ushtrisë së Koresë së Veriut janë aktualisht të pranishëm në territorin e Federatës Ruse në kufirin me Ukrainën në veri të vendit tonë në rajonin e Kurskut”, u tha Zelenski gazetarëve në samitin e Komunitetit Politik Evropian në Budapest, Hungari, të enjten.
“Disa nga këto trupa tashmë kanë marrë pjesë në luftimet kundër ushtrisë ukrainase. Po, tashmë ka humbje, ky është një fakt.”
Ai nuk ka specifikuar se cila palë ka pësuar humbje.
New York Times raportoi në fillim të kësaj jave se një numër i trupave të Koresë së Veriut ishin vrarë në një betejë mes forcave ruse dhe ukrainase, duke cituar zyrtarë të lartë amerikanë dhe ukrainas.
Njoftimi i përdorimit të trupave koreanoveriore në luftime vjen ndërsa Shtetet e Bashkuara dhe aleatët e saj po mendohen se si do t’i përgjigjen partneritetit ushtarak në rritje mes Moskës dhe Phenianit.
Ukraina dhe aleatët e saj në NATO po vlerësojnë gjithashtu se si rizgjedhja e Donald Trump do të ndikojë në balancën e luftës dhe po përgatiten për mundësinë e një reduktimi dramatik të mbështetjes së SHBA-së dy vjet e gjysmë pas pushtimit rus.
