Ministrja e Punës dhe Mirëqenies Sociale, Naida Nishiq, tha se të gjithë pensionistët që marrin mbi 450 euro do të kenë rritje prej 50-60 euro duke filluar nga viti i ri.
“Pensionet patjetër do të rriten nga viti i ri sepse rritja e pagës minimale në 600 e 800 sjell rritje të pagës mesatare, e cila padyshim ndikon në rritjen e pensioneve. Për qytetarët tanë, të gjithë ata që marrin mbi 450 euro, që nuk kanë pasur rritje janarin e kaluar, do të ketë rritje 40, 50, 60 euro, varësisht nga vlera llogaritëse dhe kjo do të jetë rritje e përhershme”, tha ajo.
Ajo vuri në dukje se në këtë mënyrë do të korrigjohet rritja lineare e pensioneve dhe do të arrijë në shtatë deri në tetë për qind.
“Ata pensionistë që kishin 440 euro, pra përmes rritjes më 01.01.2024 kanë pasur rritje në 45, tani do të kenë rregullimin e radhës, pra pensioni i tyre do të jetë 480 euro”, sqaroi ministrja.
Ajo tha se nënat me tre e më shumë fëmijë mund të kalojnë nga përfitimi në pension nëse plotësojnë kushtet, pra moshën e duhur për pensionim.
Duke folur për ish-punëtorët e Koshutës, ajo tha se mjetet do t’u paguhen me shpejtësinë me të cilën e përgatisin dokumentacionin.
“Fondi i punës tashmë ka 700 mijë euro mjete që mund t’i paguajë deri në Vitin e Ri, një pjesë e mjeteve do t’i sigurojë Ministria dhe Qeveria. Pra nuk ka arsye për t’u shqetësuar. Nuk do të ketë këste, por pasi të përgatisin dokumentacionin do të paguhen”, tha ajo.
Ajo theksoi se beson thellë se në vitin 2028 Mali i Zi do të jetë pjesë e familjes evropiane dhe se tani po bëhen përgatitje për të ruajtur tregun tonë të punës.
