Parlamenti Evropian miratoi të martën kërkesën e Bullgarisë për të adoptuar euron, duke i hapur rrugën vendit për t’u bashkuar me Eurozonën më 1 janar 2026, raporton Anadolu.
Në një votim vendimtar, 531 anëtarë të Parlamentit Evropian mbështetën këtë vendim, me 69 vota kundër dhe 79 abstenime.
Raporti i miratuar konfirmoi se Bullgaria i plotëson të gjitha kriteret e kërkuara për adoptimin e euros.
Pasi vendet anëtare të BE-së ta miratojnë zyrtarisht vendimin, Bullgaria do të bëhet vendi i 21-të që i bashkohet Eurozonës.
Vendi i fundit që miratoi euron ishte Kroacia, e cila iu bashkua Eurozonës në vitin 2023.
“Votimi i sotëm dërgon një sinjal të qartë: Bullgaria është gati të bashkohet me Eurozonën. Të gjitha kriteret janë përmbushur dhe ky hap shënon një moment kyç drejt integrimit të plotë evropian të Bullgarisë, për vendin dhe qytetarët e saj”, tha pas votimit Eva Maydell, eurodeputetja bullgare e cila shërbeu si raportuese për dosjen.
Opinioni i Parlamentit Evropian tani do t’u dërgohet shteteve anëtare të Eurozonës, të cilat pritet të japin miratimin e tyre përfundimtar më vonë sot.
