„Kur Ballkani Perëndimor është i bashkuar, ne e arrijmë qëllimin më lehtë. Vazhdojmë së bashku, nuk është e komplikuar. Kjo ishte veçanërisht e dukshme në Nju Jork dhe Berlin, ku fituam një paketë mbështetjeje në vlerë prej një miliard euro,“ theksoi kryeministri i Malit të Zi Dr. Dritan Abazoviq. Përveç kryeministrit Abazoviq, fjalën hapëse mbajtën edhe presidenti i Maqedonisë së Veriut, Stevo Pendarovski dhe kryeministri i Shqipërisë, Edi Rama. Duke folur për Ballkanin Perëndimor, Abazoviq tha se është e nevojshme që vendet e Ballkanit Perëndimor të mbeten të fokusuara në agjendën e BE-së, duke përmendur shembullin se në Mal të Zi mbi 80% e qytetarëve ende e mbështesin fuqishëm perspektivën evropiane të vendit tonë. Abazoviq e bëri të qartë se BE-ja duhet të kuptojë një gjë të thjeshtë – BE-ja duhet të mbetet gjithashtu tërheqëse për vendet e Ballkanit Perëndimor, veçanërisht pas Brexit-it dhe agresionit rus kundër Ukrainës. Nëse nuk e bëjnë, të gjithë humbasin. Jo vetëm vendet e Ballkanit Perëndimor, theksoi kryeministri Abazoviq. Unë shoh gjithnjë e më shumë të rinj që zgjidhen në parlamentin shtetëror ose lokal. Për Ballkanin Perëndimor është e rëndësishme që të kemi të rinj me ide të reja, sepse nëse kemi më shumë të rinj me ide të vjetra, pavarësisht të gjitha rrethanave, nuk do të ndryshojmë, theksoi Abazoviq, duke u bërë thirrje të rinjve të sjellin ide të reja, të luftojnë për to dhe të punojnë në një mënyrë tjetër. Duke diskutuar për marrëdhëniet në Ballkanin Perëndimor, Abazoviq tha se me më shumë komunikim, marrëdhëniet fillojnë të ndryshojnë dhe mirëkuptimi përmirësohet në kuptimin politik edhe kur nuk ka konsensus për një temë të caktuar. „Në Ballkanin Perëndimor, situata e përgjithshme do të ndryshojë nga lufta kundër korrupsionit dhe lëvizshmëri më e madhe e njerëzve. Lufta kundër korrupsionit është lufta kundër nacionalizmit – më pak korrupsion, më pak nacionalizëm. Me infrastrukturë më të mirë do të kemi lëvizshmëri më të madhe mes qytetarëve të vendeve të Ballkanit Perëndimor,“ theksoi Abazoviq.
