Delegacioni i Kuvendit, i përbërë nga Jevrosima Pejoviq, Momçillo Lekoviq dhe Jevto Erakoviq, ishte pjesë e misionit vëzhgues ndërkombëtar të Organizatës për Siguri dhe Bashkëpunim Evropian (OSBE) në zgjedhjet e përgjithshme të mbajtura më 5 nëntor në Shtetet e Bashkuara të Amerikës.
Siç thuhet në njoftim, zgjedhjet në SHBA treguan një shkallë të lartë të angazhimit të votuesve në të gjitha anët e spektrit politik, duke konfirmuar qëndrueshmërinë e institucioneve demokratike, pavarësisht polarizimit të thellë politik dhe retorikës së ashpër të fushatës, ishte konkludimi i vëzhguesve ndërkombëtarë të misionit të përbashkët të Asamblesë Parlamentare të OSBE-së dhe Zyrës për Institucione Demokratike dhe të Drejtat e Njeriut (ODIHR).
“Këto zgjedhje ishin një demonstrim i qëndrueshmërisë së institucioneve demokratike amerikane, pasi angazhimi publik mposhti pretendimet e pabaza të mashtrimit zgjedhor dhe retorikës polarizuese,” tha Pia Kauma, Koordinatore Speciale dhe Udhëheqëse e Vëzhguesve Afatshkurtër të OSBE-së.
“Dezinformimi, kërcënimet dhe rastet e dhunës politike e kanë testuar këtë vend, por këto zgjedhje kanë treguar se proceset demokratike të Amerikës mbeten të qëndrueshme. Megjithatë, shpenzimet rekord të larta të fushatës dhe sistemet që lejojnë grupet e pavarura të anashkalojnë rregulloret e financimit të fushatës kërkojnë ndryshime urgjente”, tha Pere Joan Pons, kreu i delegacionit të AP të OSBE-së.
Vëzhguesit vlerësuan respektin e gjerë për të drejtat civile dhe politike gjatë fushatës, por shprehën shqetësimin për polarizimin në rritje dhe ndikimin në rritje të mediave të ndara sipas linjave partiake.
Misioni i vëzhgimit të zgjedhjeve të SHBA-së përfshinte 249 vëzhgues nga 45 vende, duke përfshirë 85 ekspertë dhe vëzhgues afatgjatë të ODIHR-it, si dhe 164 parlamentarë dhe zyrtarë të AP të OSBE-së.
