Situata epidemiologjike në Mal të Zi aktualisht është e komplikuar për shkak se janë aktive disa epidemi, tha për Radion e Malit të Zi Dr. Darinka Markoviq, epidemiologe në Institutin e Shëndetit Publik.
Siç thotë ajo, dominon gripi, i cili është në rritje. Epidemia e kollës së mirë nuk po pakësohet. Tre pacientë aktualisht janë të shtruar në spital, dy prej tyre janë nën moshën një vjeçare.
Sipas Dr. Markoviq, të gjithë janë në gjendje të mirë shëndetësore.
Ajo u bën thirrje të gjithë banorëve të Malit të Zi, veçanërisht grupeve të rrezikuara, që ende nuk është vonë për t’u vaksinuar kundër gripit. Duhet pasur parasysh, thotë ajo, se pas vaksinimit, mbrojtja fitohet pas 10 deri në 14 ditë.
Doktoresha Markoviq paralajmëron se epidemia e fruthit po afrohet.
“Nuk është vetëm kolla e mirë ajo që është aktuale në Mal të Zi, por disa epidemi më serioze po na afrohen, siç është epidemia e fruthit aktualisht aktive në Bosnje dhe Hercegovinën fqinje, e cila më parë ishte aktuale në Rumani. Prandaj, ne mund të llogarisim me siguri se ajo epidemi është në prag të derës sonë”, thekson Markoviq dhe vëren se mbulimi i të vaksinuarve me MMR është shumë i ulët.
Ajo thekson gjithashtu se në analizat laboratorike janë vërejtur raste të infektimit me viruse të shumta. Ajo apeloi banorët e Malit të Zi që të vaksinohen sipas rekomandimeve të Ministrisë së Shëndetësisë.
“Grupet e rrezikuara duhet të vaksinohen me kohë kundër epidemive aktuale të infeksioneve të frymëmarrjes, pra kundër COVID, kundër gripit, kundër kollës së mirë”, tha Markoviq.
