Ekziston një bazë e favorshme për menaxhimin racional të dhunës në shkollat në Mal të Zi duke identifikuar individë që shpesh manifestojnë sjellje të dhunshme, si dhe nxënës që shpesh janë viktima të dhunës, në moshë të re.
Kështu thuhet në dokumentin e Institutit të Arsimit të Malit të Zi, që ka të bëjë me menaxhimin e problemit të dhunës në shkolla.
Këta nxënës, theksohet se kanë nevojë për mbështetje individuale, psikologjike për t’u integruar në kolektivin e shkollës (si ngacmuesit ashtu edhe viktimat janë të izoluar socialisht nga nxënësit e tjerë për shkak të disa karakteristikave).
Linja e dytë e zgjidhjes së problemit të dhunës në shkollë përfshin forcimin e rolit edukativ të shkollës dhe ndërtimin e një klime shkollore në të cilën dhuna nuk jep rezultat dhe ku nxënësit janë të bindur se shkolla do t’i mbrojë nga të gjitha format e dhunës.
“Hulumtimi tregoi se situata tipike me dhunën në shkollë nuk është ajo në të cilën ka një viktimë që ngacmohet nga një numër i madh fëmijësh, por një ngacmues që ngacmon një numër të madh viktimash (në rastin tonë janë 2.7% nxënës që janë ngacmues; 4% e nxënësve që kanë qenë edhe viktima dhe ngacmues në të njëjtën kohë; 13% e nxënësve që kanë qenë vetëm viktima). Ngacmuesi është zakonisht një individ dhe nganjëherë një grup nxënësish”, thuhet në dokument.
Masat për parandalimin e dhunës së nxënësve në nivel shkolle i referohen zhvillimit të arsimit, d.m.th. roli parandalues i shkollës, zhvillimi i klimës kundër dhunës, si dhe reagimi ndaj dhunës në shkollë.
