Foto: Kuvendi i Malit të Zi / Skupština Crne Gore
Inflacioni në Mal të Zi është kryesisht i importuar dhe ngjashëm me atë në vendet me të cilat kemi lidhje të forta ushqimore – Serbi dhe Kroaci, njoftoi ministri i Zhvillimit Ekonomik, Nik Gjeloshaj, duke shtuar se vazhdimisht bashkëpunojnë me partnerët kyç dhe mbajnë takime.
Ai gjatë një mbledhjeje në Komitetin parlamentar për Ekonomi, Financa dhe Buxhet, në temën “Inflacioni në Mal të Zi dhe ndikimi i tij në standardin e jetesës së qytetarëve”, tha se nuk është ministër përgjegjës për këtë çështje.
“Faleminderit për ftesën, por duhet të theksoj se nuk jam përgjegjës për këtë pyetje. Ministria jonë merret me normativat, ndërsa masat merren përmes programit të reformave ekonomike që përgatitet dhe zbatohet nga Ministria e Financave”, tha Gjeloshaj.
Ai rikujtoi hulumtimet e mëparshme që treguan se inflacioni në Mal të Zi është kryesisht i importuar dhe faktorët vendas kanë pasur ndikim më të vogël.
“Nëse analizojmë rajonin, pra Serbinë dhe Kroacinë me të cilat mbështetemi në industrinë ushqimore, ato kanë nivel të ngjashëm të inflacionit”, tha Gjeloshaj.
Ai shtoi se ka edhe shkaqe të tjera që ndikuan në inflacion, si masat që Kuvendi miratoi me propozim të Qeverisë, që përfshinin taksimin shtesë në disa sektorë.
Ministri Gjeloshaj foli edhe për propozimet e Komitetit që i janë dërguar Qeverisë dhe sektorit privat, dhe përsëriti se përfaqësuesit e Ministrisë vazhdimisht kanë pasur takime me shoqatat e punëdhënësve dhe zinxhirët tregtarë për të analizuar situatën dhe barrierat në biznes.
“Dhe do të vazhdojmë ta bëjmë këtë”, tha ai.
Ai shtoi se ka mbështetje të shtuar për prodhimin vendas dhe se janë riorientuar disa fonde për prodhimin në industrinë ushqimore. Për vitin e ardhshëm, siç shtoi ai, janë parashikuar rritje të mëtejshme.
“Çdo cent i investuar në programet e zhvillimit të konkurrencës së ekonomisë dhe buxhetit agro, kthehet shtetit shumëfish”, theksoi Gjeloshaj.
Po ashtu, ai deklaroi se është punuar për të rritur dukshmërinë e produkteve vendase në markete dhe mbështet uljen e taksave për produktet e shëndetshme, konkretisht TVSH-në për fruta dhe perime.
