Mali i Zi dhe Kina shënojnë 15 vjet nga vendosja e marrëdhënieve diplomatike midis dy vendeve. Për 15 vitet e fundit, Mali i Zi dhe Kina kanë punuar hapur, me përkushtim dhe në interesin e përbashkët, duke respektuar zgjedhjet dhe vizionet e ndërsjella në rrugën e zhvillimit dhe duke respektuar përparësitë kombëtare, siç bëjnë miqtë, tha Presidenti i Malit të Zi Millo Gjukanoviq. Me rastin e 15 vjetorit të vendosjes së marrëdhënieve malazeze-kineze, ai rikujtoi se falë bashkëpunimit të përbashkët, po realizohet projekti më i vlefshëm i infrastrukturës në historinë e Malit të Zi, ndërtimi i pjesës së parë të autostradës e cila do të të përfundojë në fund të nëntorit. Po ashtu, rikujtoi se në një bisedë telefonike të fundit me Presidentin kinez Xi Jinping, cilësia e lartë e marrëdhënieve dypalëshe dhe personale u konfirmua reciprokisht. Gjukanoviq vlerësoi gjithashtu se bashkëpunimi më i rëndësishëm midis vendeve është në fushën e ekonomisë, brenda iniciativës Belt and Road dhe mekanizmit 17 + 1, në të cilin Mali i Zi ka qenë një pjesëmarrës aktiv në nivelin më të lartë që nga themelimi i tij. Gjithashtu kujtoi për projekte të tjera të rëndësishme të përbashkëta, të tilla si rindërtimi i hekurudhës Beograd-Bar, donacioni për rindërtimin e urës në lumin Tara, si dhe planet për bashkëpunim në fushën e mjedisit.
