Le të bëjmë gjithçka për ta bërë botën pas koronës një vend më të mirë. Që Evropa të ruajë vlerat e demokracisë perëndimore, shoqërinë liberale, liritë dhe të drejtat e njeriut, ekonominë e tregut me funksione efektive shtetërore. Ne nuk duhet të lëmë Ballkanin palëve të treta sepse është një strukturë e gjallë evropiane, tha Presidenti i Malit të Zi Millo Gjukanoviq në Samitin BE-Ballkan Perëndimor në Zagreb.
Siç theksoi Gjukanoviq, Mali i Zi ka forcuar stabilitetin dhe besimin në kapacitetet e veta në kohë krizash. Institucionet, sistemi i kujdesit shëndetësor, qytetarët e Malit të Zi kanë treguar vitalitet, përgjegjësi dhe kompetencë. Siç tha ai, doli që rruga e zhvillimit evropian që nga rivendosja e pavarësisë nuk ishte e kotë, se ne jemi një shoqëri që është në gjendje të përballojë sfidat shumë të ndërlikuara.
“Sigurisht, ne nuk ndalemi këtu. Ne vazhdojmë të ndërtojmë me vendosmëri një shoqëri të hapur evropiane të demokracisë dhe sundimit të ligjit. Ne jemi të përqendruar në rimëkëmbjen ekonomike dhe zhvillimin e vazhdueshëm dinamik. Ekonomia e gjelbër, transformimi dixhital dhe diversifikimi mbeten parimi udhëzues për qëllimin strategjik: arritjen e cilësisë evropiane të jetës për qytetarët tanë,” tha Gjukanoviq.
Presidenti i Malit të Zi theksoi se ata ranë dakord se ishte koha për një pozicionim të ri gjeopolitik të BE-së në skenën globale.
“Mënyra për këtë është forcimi i stabilitetit dhe mobilizimi i të gjitha resurseve evropiane të zhvillimit në mënyrë që të jenë konkurrues. Dhe kjo nënkupton domosdoshmërisht përfundimin e procesit të bashkimit evropian. Nuk ka asnjë mesazh më bindës për të gjithë ata që janë duke provuar vendosmërinë dhe qëndrueshmërinë e BE-së në mbrojtjen e sistemit evropian të vlerave në Ballkan. Në të njëjtën kohë, ne në Ballkanin Perëndimor jemi të vetëdijshëm që anëtarësimi ynë në BE ka kuptim, nëse kontribuon në cilësinë e re dhe konkurrencën globale të Evropës. Kjo është arsyeja pse reformat, zhvillimi dhe arritja e standardeve të anëtarësimit mbeten përparësia jonë absolute,” thekson Gjukanoviq.
Ai tha në samit se procesi i evropianizimit të Ballkanit Perëndimor mund të përshpejtohet “kryesisht nga lidhje cilësore infrastrukturore me BE, përmes një investimi gjithëpërfshirës dhe të përqendruar saktësisht dhe kornizës strategjike”.
Ai shprehu ngushëllime për humbjen e jetës së qytetarëve si shkakë i pandemisë së koronavirusit. Ai gjithashtu falënderoi Kroacinë, e cila tregoi udhëheqje në nivelin evropian dhe fqinjësi të mirë shembullore në rrethana të jashtëzakonshme të pandemisë dhe tërmetit në Zagreb.
“Faleminderit BE për mesazhet e saj inkurajuese për Ballkanin Perëndimor pas konstituimit të institucioneve të reja evropiane. Hapja e negociatave me Maqedoninë e Veriut dhe Shqipërinë, emërimi i një përfaqësuesi special, mbështetja prej 3.3 miliardë eurosh për të rregulluar pasojat e pandemisë, dhe mbajtja e Samitit në këto rrethana janë një konfirmim i entuziazmit të përtërirë të partnerëve evropianë në rajonin tonë,” përfundoi Gjukanoviq.
